ബാലഭാസ്‌കര്‍ കേസിന്‍റെ അന്വേഷണ പുരോഗതി റിപ്പോർട്ട് ഇന്ന് ഹൈക്കോടതിയിൽ

കൊച്ചി: വയലിനിസ്റ്റ് ബാലഭാസ്കറിന്‍റെ മരണവുമായി ബന്ധപ്പെട്ട കേസിന്‍റെ അന്വേഷണ പുരോഗതി റിപ്പോർട്ട് ക്രൈംബ്രാഞ്ച് ഇന്ന് ഹൈക്കോടതിയിൽ സമര്‍പ്പിക്കും. ഹൈക്കോടതി ആവശ്യപ്പെട്ടത് പ്രകാരമാണ് പോലീസ് ഇന്ന് റിപ്പോര്‍ട്ട് സമര്‍പ്പിക്കുന്നത്. ചൊവ്വാഴ്ച തിരുവനന്തപുരം സ്വർണക്കടത്ത് കേസിലെ പ്രതികളുടെ ജാമ്യാപേക്ഷ പരിഗണിക്കുന്നതിനിടെയാണ് കോടതി അന്വേഷണ റിപ്പോർട്ട് ഹാജരാക്കാൻ ആവശ്യപ്പെട്ടത്.

ബാലഭാസ്കറിന്‍റെ അപകടമരണവുമായി ബന്ധപ്പെട്ട് എല്ലാ സാധ്യതകളും അന്വേഷണത്തിന് വിധേയമാക്കുകയാണ് പോലീസ്. ഇതിനിടെ വിമാനത്താവളം വഴി നടക്കുന്ന സ്വർണ്ണക്കടത്തുമായി മരണത്തിന് ബന്ധമുണ്ടെന്ന് ആരോപണം ഉയർന്ന സാഹചര്യത്തിലാണ് അന്വേഷണ പുരോഗതി റിപ്പോര്‍ട്ട് സമര്‍ര്രിക്കാന്‍ ഹൈക്കോടതി ക്രൈം ബ്രാഞ്ചിനോട് ആവശ്യപ്പെട്ടത്. ബാലഭാസ്കറിന്‍റെ പ്രോഗ്രാം മാനേജർ പ്രകാശ് തമ്പി അടക്കമുള്ളവരാണ് സ്വർണക്കടത്ത് കേസിലെ പ്രതികൾ. വിദേശത്ത് പ്രോഗാമുകളില്‍ പങ്കെടുക്കുക വഴി സ്വര്‍ണം കടത്തിയിട്ടുണ്ടോയെന്നാണ് പോലീസ് അന്വേഷിക്കുന്നത്.

സ്വര്‍ണക്കടത്ത് കേസിലെ കൂട്ടു പ്രതികളായ സെറീന ഷാജി, സുനിൽ കുമാർ, പോൾ ജോസ് തുടങ്ങിയ പ്രതികളുടെ ജാമ്യാപേക്ഷ പരിഗണിക്കുന്നതിനിടെയാണ് ഹൈക്കോടതി പോലീസിനോട് അന്വേഷണ പുരോഗതി റിപ്പോർട്ട് അവശ്യപ്പെട്ടത്. രണ്ട് ദിവസത്തിനകം റിപ്പോർട്ട് സമർപ്പിക്കണമെന്നാണ് ക്രൈം ബ്രാഞ്ചിന് നി‍ർദേശം നൽകിയിരിക്കുന്നത്. അതേസമയം സ്വർണകടത്ത് കേസിലെ പ്രതികൾക്ക് ജാമ്യം നൽകരുതെന്ന ആവശ്യമാണ് ക്രൈം ബ്രാഞ്ച് കോടതിയില്‍ ഉയര്‍ത്തിയത്.