മരണകാരണം തലയ്ക്കുള്ളിലുണ്ടായ രക്തസ്രാവം; ക്രിക്കറ്റ് ബാറ്റ് തട്ടി മരിച്ച കുട്ടിയുടെ പോസ്റ്റ്‌മോര്‍ട്ടം റിപ്പോര്‍ട്ട് പുറത്ത്

ആലപ്പുഴ: ക്രിക്കറ്റ് ബാറ്റുകൊണ്ട് തലയ്ക്കടിയേറ്റതിനെ തുടര്‍ന്ന് മരിച്ച ചുനക്കര ഗവണ്‍മെന്റ് സ്‌കൂളിലെ ആറാം ക്ലാസ് വിദ്യാര്‍ഥി നവനീതിന്റെ പോസ്റ്റ്‌മോര്‍ട്ടം റിപ്പോര്‍ട്ട് പുറത്ത്. തലയ്ക്കുള്ളിലുണ്ടായ രക്തസ്രാവം മൂലമെന്ന് പോസ്റ്റ്‌മോര്‍ട്ടം റിപ്പോര്‍ട്ട് വ്യക്തമാക്കുന്നു.

ഉച്ചഭക്ഷണം കഴിച്ചതിനു ശേഷം നവനീത് കൈ കഴുകാന്‍ ഇറങ്ങിയതായിരുന്നു. കുട്ടികള്‍ കളിക്കുന്നതിനിടെ കൈവിട്ട് തെറിച്ച തടികൊണ്ടുള്ള ക്രിക്കറ്റ് ബാറ്റ് കുട്ടിയുടെ തലയില്‍ തട്ടുകയായിരുന്നു. ഇതേതുടര്‍ന്ന് നവനനീത് കുഴഞ്ഞുവീണ് മരിക്കുകയായിരുന്നു.

Also Read: ഭക്ഷണശേഷം കൈകഴുകാൻ പോയ വിദ്യാർഥി ക്രിക്കറ്റ് ബാറ്റ് തെറിച്ചു കൊണ്ട് മരിച്ചു

സ്‌കൂള്‍ കെട്ടിടത്തിന് മുന്നില്‍ ഒടിഞ്ഞ ഡെസ്‌കിന്റെ പട്ടികയും പേപ്പര്‍ ചുരുട്ടിക്കെട്ടി ഉണ്ടാക്കിയ ബോളും ഉപയോഗിച്ചാണ് കുട്ടികള്‍ കളിച്ചത്. ഇവരുടെ ഇടയിലേക്ക് ഓടിവന്ന നവനീതിന്റെ തലയില്‍ പട്ടികക്കഷ്ണം അബദ്ധത്തില്‍ കൊള്ളുകയായിരുന്നു. കുറച്ച് ദൂരം മുന്നോട്ടുപോയ നവനീത് മുഖം നിലത്തടിച്ച് താഴെ വീഴുകയായിരുന്നു.

നവനീത് ബോധരഹിതനായി കിടക്കുന്ന വിവരം വിദ്യാര്‍ഥികള്‍ അധ്യാപകരെ അറിയിച്ചു. തുടര്‍ന്ന്, അധ്യാപകരും സ്‌കൂളില്‍ ഉണ്ടായിരുന്നു പിടിഎ അംഗങ്ങളും ചേര്‍ന്ന് നവനീതിനെ ആശുപത്രിയില്‍ എത്തിച്ചെങ്കിലും മരണം സംഭവിക്കുകയായിരുന്നു.