പിപിഇ കിറ്റ് വാങ്ങാനും പ്രവാസികൾക്ക് പണമുണ്ടോ? സർക്കാർ നിർദേശം പ്രായോഗികമല്ലെന്ന് ഉമ്മൻ ചാണ്ടി

തിരുവനന്തപുരം: കൊവിഡ് പരിശോധനയ്ക്ക് തടസ്സമുള്ള വിദേശരാജ്യങ്ങളിൽ യാത്രക്കാർക്ക് പിപിഇ കിറ്റ് ധരിച്ച് വിമാനത്തിൽ നാട്ടിലെത്താമെന്ന സംസ്ഥാന സർക്കാർ നിർദേശവും തള്ളി കോൺഗ്രസ് നേതാവ് ഉമ്മൻ ചാണ്ടി. പ്രവാസികളോട് സംസ്ഥാന സർക്കാർ നീതി കാണിച്ചില്ലെന്നാണ് ഉമ്മൻ ചാണ്ടിയുടെ ആരോപണം. അതിഥി തൊഴിലാളികൾക്കുള്ള പരിഗണന പോലും പ്രവാസികൾക്ക് നൽകിയില്ലെന്ന് ഉമ്മൻ ചാണ്ടി പറഞ്ഞു.

ഇവിടെ ജയവും തോൽവിയുമല്ല പ്രശ്നമെന്നും സർക്കാർ നിർദേശം പ്രായോഗികമാണോ എന്ന് പരിശോധിക്കണമെന്നും ഉമ്മൻ ചാണ്ടി ആവശ്യപ്പെട്ടു. പിപിഇ കിറ്റിൻ്റെ ചെലവ് സർക്കാർ വഹിക്കണമെന്നും ഉമ്മൻ ചാണ്ടി ആവശ്യപ്പെട്ടു.

പ്രവാസികളെ നാട്ടിലെത്തിക്കാനല്ല, അവരെ നിരുത്സാഹപ്പെടുത്താനാണ് സർക്കാർ ശ്രമിച്ചെന്ന് ഉമ്മൻ ചാണ്ടി ആരോപിച്ചു. പിപിഇ കിറ്റ് സുഗമമായി ലഭിക്കുമോ എന്നും പ്രവാസികൾക്ക് അത് താങ്ങാൻ കഴിയുമോ എന്നും ഉമ്മൻ ചാണ്ടി ചോദിച്ചു. തുടക്കം മുതൽ പ്രവാസികൾ വരേണ്ടെന്നാണ് സർക്കാർ നിലപാടെന്നും മരണസംഖ്യ കൂടുന്ന സമയത്തും അവരുടെ വരവ് മുടക്കാൻ സർക്കാർ ശ്രമിക്കുകയാണെന്നും ഉമ്മൻ ചാണ്ടി ചൂണ്ടിക്കാട്ടി. ഈ കാര്യത്തിൽ അടിയന്തര നടപടിയുണ്ടാകണമെന്നും ഉമ്മൻ ചാണ്ടി ആവശ്യപ്പെട്ടു.

Also Read: 'പ്രവാസികൾക്ക് മടങ്ങിവരാൻ പിപിഇ കിറ്റ് മതി'; പരിശോധന ലഭ്യമല്ലെങ്കിൽ ബദൽ സംവിധാനം

കൊവിഡ് ജാഗ്രതയുടെ കാര്യത്തിൽ മത്സരത്തിനില്ലെന്നും പ്രതിപക്ഷം ജനങ്ങൾക്കൊപ്പമാണെന്നും ഉമ്മൻ ചാണ്ടി പറഞ്ഞു. നടപടികൾ ഓരോ രാജ്യത്തെയും നിയമങ്ങൾ പരിശോധിച്ചു വേണമെന്ന് പ്രതിപക്ഷം ആവശ്യപ്പെട്ടിരുന്നു. ജാഗ്രത നിലനിർത്തിത്തന്നെ പ്രായോഗികമായ കാര്യങ്ങൾ ചെയ്ത് പ്രവാസികളെ കൊണ്ടുവരണം. സർക്കാർ നടപടികൾ പ്രായോഗികമല്ലെന്ന വിമർശനം സർക്കാർ ചെവിക്കൊണ്ടില്ല. സർക്കാരിൻ്റെ മുഖം രക്ഷിക്കാനാണ് പിപിഇ കിറ്റ് കൊണ്ടു വരുന്നതെന്നും ഉമ്മൻ ചാണ്ടി ആരോപിച്ചു. സർക്കാർ തീരുമാനം സ്വാഗതം ചെയ്യാറായിട്ടില്ലെന്നും തുടക്കം മുതൽ തീരുമാനം തെറ്റഇയതിൻ്റെ ജാള്യത പിപിഇ കിറ്റ് വെച്ച് മറയ്ക്കാനാണ് സർക്കാർ ശ്രമിക്കുന്നതെന്നും ഉമ്മൻ ചാണ്ടി പറഞ്ഞു.


വിദേശരാജ്യങ്ങളിൽ നിന്ന് തിരിച്ചെത്താൻ കൊവിഡ് പരിശോധന നടത്തി നെഗറ്റീവ് റിസൾട്ട് വേണമെന്ന കേരള സംസ്ഥാന സർക്കാർ നിർദ്ദേശം വലിയ വിമർശനത്തിന് ഇടയാക്കിയിരുന്നു. പല രാജ്യങ്ങളിലും കേരള സർക്കാർ നിർദേശിക്കുന്ന ട്രൂനാറ്റ് പരിശോധന ലഭ്യമല്ലെന്നതും മറ്റു പ്രായോഗിക പ്രശ്നങ്ങളുമാണ് പ്രവാസി സംഘടനകൾ ഉയർത്തിയത്. ഇതിനു പിന്നാലെയാണ് സർക്കാർ നിബന്ധനകളിൽ ഇളവ് വരുത്തി പിപിഇ കിറ്റ് ധരിച്ച് യാത്രക്കാർക്ക് വിമാനത്തിൽ കയറാമെന്ന് വ്യക്തമാക്കിയത്.