തൃശൂര്: സേഫ് ആന്റ് സ്ട്രോംഗ് നിക്ഷേപ തട്ടിപ്പ് കേസിലെ പ്രതി പ്രവീണ് റാണ പിടിയിലായി. പൊള്ളാച്ചിയിലെ ഒളിസങ്കേതത്തില് നിന്നുമാണ് പ്രവീണ് റാണ പിടിയിലായിരിക്കുന്നത്. ദേവരായപുരത്തെ കരിങ്കല് ക്വാറിയില് ഒളിവില് കഴിയുകയായിരുന്നു. സന്യാസി വേഷത്തില് ഒളിവില് കഴിയുകയായിരുന്നു റാണ. അതിഥി തൊഴിലാളിയുടെ ഫോണില് നിന്നും വീട്ടുകാരെ വിളിച്ചത് നിര്ണായകമായി. പെരുമ്പാവൂര് സ്വദേശിയാണ് ഒളിവില് കഴിയാന് റാണയെ സഹായിച്ചതെന്നാണ് വിവരം. ബലം പ്രയോഗിച്ചാണ് പോലീസ് റാണയെ കീഴ്പ്പെടുത്തിയത്.
കോടിക്കണക്കിന് രൂപയുടെ തട്ടിപ്പാണ് പ്രവീണ് റാണ നടത്തിയത്. സംസ്ഥാനത്തെ വിവിധ സ്റ്റേഷനുകളിലായി നിരവധി പരാതികള് ഇതിനോടകം ലഭിച്ചുകഴിഞ്ഞു. സംസ്ഥാനത്തിന് പുറത്തും സമാനമായ രീതിയില് തട്ടിപ്പുകള് നടത്തിയിട്ടുണ്ടോയെന്ന് പോലീസ് അന്വേഷിച്ച് വരികയാണ്. പ്രവീണ് റാണ ഒളിവില് പോയതിന് പിന്നാലെ പോലീസ് ലുക്കൗട്ട് നോട്ടീസ് പുറപ്പെടുവിക്കുകയും ചെയ്തിരുന്നു. റാണ രാജ്യം വിടാനുള്ള സാധ്യത കണക്കിലെടുത്ത് ഊര്ജ്ജിതമായ അന്വേഷണമാണ് പോലീസ് നടത്തി വന്നത്.
ഉയര്ന്ന പലിശയും ലാഭവും വാഗ്ദാനം ചെയ്താണ് നിക്ഷേപകരില് നിന്നും പ്രവീണ് റാണ കോടികള് തട്ടിയെടുത്തത്. നിക്ഷേപകര് കൂട്ടത്തോടെ പരാതിയുമായി എത്തിയതോടെ റാണ രക്ഷപെടുകയായിരുന്നു. ഇതിനിലെ ഇയാള് കലൂരിലെ ഫ്ലാറ്റിലുണ്ടെന്ന് വിവരം ലഭിച്ചതിനെ തുടര്ന്ന് പോലീസ് അവിടെയെത്തിയെങ്കിലും മറ്റൊരു ലിഫ്റ്റിലൂടെ ഇയാള് അവിടെ നിന്നും രക്ഷപെടുകയായിരുന്നു. റാണയുടെ വാഹനങ്ങളും ഇടപാടുകള് സംബന്ധിച്ചുള്ള നിരവധി രേഖകളും പോലീസ് പിടിച്ചെടുത്തിട്ടുണ്ട്. സ്വയം സൃഷ്ടിച്ച താരപരിവേഷവും ആഡംബര ജീവിതവും നിക്ഷേപകരുടെ വിശ്വാസ്യത നേടിയെടുക്കാന് ഇയാളെ സഹായിച്ചു. ഇതിനിടെ 3 മാസത്തിനിടെ 61 കോടി രൂപ വിവിധ അക്കൗണ്ടുകളില് നിന്നായി പ്രവീണ് റാണ പിന്വലിച്ചതായി പോലീസിന് വിവരം ലഭിച്ചിട്ടുണ്ട്. തൃശൂരിലെ റിസോര്ട്ടിന്റെ മറവിലും ഇയാള് തട്ടിപ്പ് നടത്തിയതായാണ് വിവരം.
Read Latest Kerala News and Malayalam News