14 മരുന്നിനങ്ങളുടെ വിലയിൽ നിയന്ത്രണമേർപ്പെടുത്തി

കൊച്ചി: ജീവിത ശൈലി രോഗങ്ങൾ, അർബുദം എന്നിവയ്ക്ക് ഉൾപ്പടെയുള്ള 14 മരുന്നിനങ്ങളെ വിലനിയന്ത്രണത്തിൽ ഉൾപ്പെടുത്തി. ദേശീയ ഔഷധവിലനിയന്ത്രണ സമിതിയുടെ പുതിയ ഉത്തരവിലുള്ള 12 എണ്ണവും സംയുക്തങ്ങളാണ്.

അര്‍ബുദചികിത്സയിലെ കീമോ തെറാപ്പിക്ക് ഉപയോഗിക്കുന്ന പാക്ലിടാക്‌സല്‍ ഇന്‍ഞ്ചക്ടബിള്‍ സസ്‌പെന്‍ഷന്‍ ഒരു വയലിന് 11,115.39 രൂപയാക്കി കുറച്ചു. നിലവിൽ 11,543 രൂപയാണ് ഈ മരുന്നിന്‍റെ വില. അര്‍ബുദത്തിനെതിരെ നടത്തുന്ന കുത്തിവെപ്പ് മരുന്നായ ബോര്‍ട്ടിസോമിബിന്‍റെ വില ഒരു വയലിന് 12,500 രൂപയുമാക്കി.

ഹെപ്പറ്റൈറ്റിസ് സി-ക്ക് ഉപയോഗിക്കുന്ന സോഫോസ്ബുവിറും വെല്‍പ്പറ്റസ്വിറും ചേര്‍ന്ന ഗുളിക 28 എണ്ണത്തിന്‍റെ പായ്ക്കിന് 15,625 രൂപയാക്കി കുറച്ചു. 18,500 രൂപയാണ് ഇപ്പോഴത്തെ വില.

പ്രമേഹം, കൊളസ്‌ട്രോള്‍, രക്തസമ്മര്‍ദം തുടങ്ങിയ ജീവിതശൈലീ രോഗങ്ങള്‍ക്കുള്ള മരുന്നുകളുടെ വിലയിലും നിയന്ത്രണമേർപ്പെടുത്തിയിട്ടുണ്ട്.