പേരാമ്പ്രയിലെ പതിനാലുകാരിയുടെ മരണം: ഷിഗെല്ല ബാക്ടീരിയയല്ലെന്ന് പ്രാഥമിക പരിശോധനാഫലം

കോഴിക്കോട്: പേരാമ്പ്രയിലെ പതിനാല് വയസ്സുകാരിയുടെ മരണത്തിന് കാരണം ഷിഗെല്ല ബാക്ടീരിയയല്ലെന്ന് പ്രാഥമിക പരിശോധനാഫലം. സമാന രോഗലക്ഷണങ്ങളുമായി ചികിത്‍സയില്‍ കഴിയുന്ന കുട്ടിയുടെ ബന്ധുക്കള്‍ക്കും ഷിഗെല്ലയില്ലെന്ന് സ്ഥിരീകരിച്ചു.

ഒരാഴ്‍ച മുമ്പാണ് പേരാമ്പ്ര ആവടുക്ക സ്വദേശി സനുഷ പനിയും വയറിളക്കവും ഛര്‍ദിയും ബാധിച്ച് മരിച്ചത്. അതിനുശേഷം കുട്ടിയുടെ സഹോദരിക്കും അമ്മയുടെ അച്ഛനും സമാന രോഗലക്ഷണങ്ങളുണ്ടായി. ഇരുവരെയും കോഴിക്കോട് മെഡിക്കല്‍ കോളേജ് ആശുപത്രിയില്‍ പ്രവേശിപ്പിച്ചു.

തുടര്‍ന്നാണ് ഷിഗെല്ല ബാക്ടീരിയ ബാധ സംശയിച്ച് മൂവരുടെയും ശരീരത്തില്‍ നിന്ന് സാമ്പിളുകള്‍ ശേഖരിച്ച് പരിശോധനയ്ക്കയച്ചത്. സനുഷയുടെ സ്രവങ്ങള്‍ പരിശോധിച്ചതില്‍ ഷിഗെല്ല ബാക്ടീരിയ ഇല്ലെന്നാണ് പ്രാഥമിക ഫലം. ആന്തരിക അവയവങ്ങളുടെ പരിശോധനാഫലം ലഭിക്കുന്നതുവരെ ജില്ലയില്‍ ജാഗ്രത തുടരാനാണ് ആരോഗ്യ വകുപ്പിന്‍റെ തീരുമാനം.

കുട്ടിയുടെ ബന്ധക്കുള്‍ക്ക് ഷിഗെല്ലയില്ലെന്നാണ് പരിശോധനയില്‍ വ്യക്തമായത്. രോഗം ഭേദമായാല്‍ ഇവര്‍ ആശുപത്രി വിടും. പ്രളയത്തിനുശേഷം കുടിവെള്ളം മലിനമായതാണ് രോഗബാധയ്ക്ക് കാരണമെന്നും സംശയിക്കുന്നുണ്ട്. പ്രദേശത്തെ കിണറുകളിലെ വെള്ളം പരിശോധനയ്ക്ക് അയച്ചിട്ടുണ്ട്.