വിയ്യൂർ ജയിലിൽ തടവുകാരൻ മരിച്ചു

വിയ്യൂർ: ‌വിയ്യൂർ ജയിലിൽ തടവുകാരൻ മരിച്ചു. വധശിക്ഷക്ക് വിധിക്കപ്പെട്ട് പിന്നീട് സുപ്രീം കോടതി ‌ജീവപര്യന്തമായി ഇളവുനൽകിയ തൊടുപുഴ കരിമാന്നൂർ ഏഴുംമുട്ടും‌ചേരക്കുന്നിൽ ജോഷി (47) ആണ് ‌മരിച്ചത്. ബന്ധുക്കളായ മൂന്ന് പേരെ കൊലപ്പെടുത്തിയ കേസിലാണ് ഇയാൾ ശിക്ഷ അനുഭവിച്ച് ‌വന്നിരുന്നത്.

തിരുവനന്തപുരം സെൻട്രൽ ജയിലിലായിരുന്ന ഇയാളെ പ്രമേഹ രോഗത്തെ തുടർന്ന് ഒന്നര വർഷം മുമ്പാണ് ചികിത്സയുടെ ഭാഗമായി വിയ്യൂരിലേക്ക് മാറ്റിയത്. അസുഖം ഗുരുതരമായതിനെ തുടർന്ന് ഒരു കാൽമുട്ടിന് താഴെ ‌വെച്ചും ഒരു കാലിലെ വിരലുകളും മുറിച്ചുമാറ്റിയിരുന്നു.

മൃതദേഹം പോസ്‌റ്റുമോർട്ടത്തിന് ശേഷം ബന്ധുക്കൾക്ക് വിട്ടുകൊടുക്കും.