ദുരിതാശ്വാസ നിധിയിലേക്ക് പണം നല്‍കാന്‍ തടവുകാരും

തിരുവനന്തപുരം: ലോകത്തിന്‍റെ നാനാഭാഗങ്ങളില്‍ നിന്നും മുഖ്യമന്ത്രിയുടെ ദുരിതാശ്വാസ നിധിയിലേക്ക് സഹായ സഹകരണങ്ങള്‍ ഒഴുകുമ്പോള്‍ അതില്‍ പങ്കാളികളാവാനായി സംസ്ഥാനത്തെ ജയില്‍ തടവുകാരും.

ജയിലിലെ ജോലിക്ക് ലഭ്യമാകുന്ന കൂലിയിൽ നിന്നും മുഖ്യമന്ത്രിയുടെ ദുരിതാശ്വാസ നിധിയിലേക്ക് പണം നൽകാന്‍ ആഗ്രഹിക്കുന്നതായി തടവുകാർ അഭ്യർത്ഥിച്ചതായി ജയിൽ മേധാവികള്‍ അറിയിച്ചു.

ഇത് സംബന്ധിച്ച് ഡിജിപി ആർ ശ്രീലേഖ ആഭ്യന്തര വകുപ്പിന് കത്തയച്ചു. വീട് പുനർനിർമ്മാണ ജോലികൾക്ക് തയ്യാറാണെന്നും തടവുകാർ അറിയിച്ചതായി ശ്രീലേഖ പറഞ്ഞു. പൊലീസ് സംരക്ഷണയിൽ തടവുകാരുടെ സേവനം ഉപയോഗിക്കാമെന്നും ജയിൽ മേധാവി ശുപാര്‍ശ ചെയ്തിട്ടുണ്ട്.

നേരത്തെ ദുരിതാശ്വാസ ക്യാമ്പുകളിലെത്തിയവര്‍ക്ക് ജയിലില്‍ നിന്നാണ് ദിവസവും 30,000 പാക്കറ്റ് ഭക്ഷണമെത്തിയിരുന്നത്. ഇതിനുപുറമെയാണ് മുഖ്യമന്ത്രിയുടെ ദുരിതാശ്വാസ നിധിയിൽ പണം നൽകാൻ അനുവദിക്കണമെന്ന തടവുകാരുടെ അഭ്യർത്ഥന. സൂപ്രണ്ടുമാർ മുഖേന അഭ്യർത്ഥനയെത്തിപ്പോഴാണ് അനുമതി തേടി ആഭ്യന്തരവകുപ്പിന് ജയിൽ മേധാവികള്‍ കത്തയച്ചത്.

ഏഴായിരത്തിലധികം തടവുകാരാണ് സംസ്ഥാനത്തെ വിവിധ ജയിലുകളിലുള്ളത്. ഇവരിൽ ഒട്ടേറെ പേര്‍ വിവിധ ജോലികളിൽ പരിശീലനം നേടിയവരാണ്. ദുരിതാശ്വാസ ക്യമ്പുകളിലേക്ക് വിതരണം ചെയ്യാനായി പുതപ്പുകളും ഉടുപ്പുമെല്ലാം ജയിലിൽ തയ്യാറായി വരുന്നുണ്ടെന്നും ജയില്‍ മേധാവികള്‍ അറിയിച്ചു.