മലപ്പുറത്ത് ബസ് മറിഞ്ഞ് വീട്ടമ്മ മരിച്ചു; 50 പേര്‍ക്ക് പരിക്ക്

കോട്ടയ്ക്കല്‍: മലപ്പുറം കോട്ടയ്ക്കലിന് സമീപം എടരിക്കോട് പാലച്ചിറമാട് ബസ് മറിഞ്ഞ് വീട്ടമ്മ മരിച്ചു. കോഴിക്കോട് നിന്നും തൃശൂരിലേക്ക് പോയ സ്വകാര്യ ബസ് മറിഞ്ഞാണ് അപകടമുണ്ടായത്. വളാഞ്ചേരി സ്വദേശിയായ പ്രഭാവതിയമ്മ (57)യാണ് മരിച്ചത്. അപകടത്തിൽ 50 പേര്‍ക്ക് പരിക്കേറ്റിട്ടുണ്ട്. ഇവരില്‍ മൂന്നുപേരുടെ തലയ്ക്കാണ്‌ പരിക്കേറ്റിട്ടുള്ളത്, ഇവരുടെ നില ഗുരുതരമാണ്.

കോഴിക്കോട് - തൃശൂര്‍ റൂട്ടില്‍ സര്‍വീസ് നടത്തുന്ന സ്വകാര്യ ബസായ വിനായകയാണ് അപകടത്തില്‍പ്പെട്ടത്. ബസിന്‍റെ അമിത വേഗമാണ്‌ അപകട കാരണമെന്ന് ദൃക്സാക്ഷികൾ വ്യക്തമാക്കുന്നു. മുൻപും ബസുകളുടെ അമിതവേഗം സംബന്ധിച്ച്‌ നാട്ടുകാര്‍ അധികൃതര്‍ക്ക് മുന്നിൽ പരാതിപ്പെടുകയും പരസ്യമായി പ്രതിഷേധിക്കുകയും ചെയ്തിരുന്നു. എന്നാല്‍, അതില്‍ യാതൊരു നടപടിയും ഉണ്ടായില്ലെന്നും നാട്ടുകാര്‍ വ്യക്തമാക്കി. ഈ അപകടം കൂടി നടന്നതിന് പിന്നാലെ ഈ റൂട്ടിൽ വിനായക ബസിന് ഓടാനുള്ള പെര്‍മിറ്റ് റദ്ദാക്കണമെന്നാണ് നാട്ടുകാര്‍ ആവശ്യപ്പെടുന്നത്.