ചാര്‍ജ് വര്‍ധന ആവശ്യപ്പെട്ട് ബസുടമകള്‍ സമരത്തിലേക്ക്

കോഴിക്കോട്: ബസ് ചാര്‍ജ് വര്‍ധന ആവശ്യപ്പെട്ട് സംസ്ഥാനത്തെ സ്വകാര്യ ബസുടമകള്‍ സമരത്തിനൊരുങ്ങുന്നു. ഇന്ധനവില രൂക്ഷമായ സാഹചര്യത്തില്‍ മിനിമം ചാര്‍ജ് 10 രൂപയാക്കണമെന്ന ആവശ്യമാണ് ബസുടമകള്‍ പ്രധാനമായും മുന്നോട്ട് വെക്കുന്നത്. അതേസമയം നേരിട്ട് ചാര്‍ജ് വര്‍ധന എന്ന ആവശ്യം ഉന്നയിക്കുന്നതിന് പകരം ഇന്ധനവിലയില്‍ സബ്സിഡി അനുവദിക്കുക, നികുതി കുറയ്ക്കുക തുടങ്ങിയ ആവശ്യങ്ങളാണ് ബസുടമകള്‍ ഉന്നയിക്കുന്നത്.

ഈ ആവശ്യങ്ങള്‍ ഉന്നയിച്ച് മുഖ്യമന്ത്രിയുമായും ഗതാഗത മന്ത്രിയുമായും ചര്‍ച്ച നടത്താനാണ് ബസുടമകളുടെ തീരുമാനം. ചര്‍ച്ചയില്‍ സര്‍ക്കാര്‍ അനുകൂലമായ നിലപാട് കൈക്കൊണ്ടില്ലെങ്കില്‍ സമരത്തിലേക്ക് നീങ്ങും. അതേസമയം മുഖ്യമന്ത്രിയുടെ ദുരിതാശ്വാസനിധിലേക്ക് അടക്കം വലിയ സംഭാവനയാണ് ബസുടമകളും ജീവനക്കാരും നല്‍കിയിട്ടുള്ളത്. ഈ സാഹചര്യത്തില്‍ സര്‍ക്കാര്‍ അനുകൂലനിലപാട് സ്വീകരിക്കുമെന്ന പ്രതീക്ഷയിലാണ് ബസുടമകള്‍.