എടിഎം കവര്‍ച്ചകള്‍ക്ക് പിന്നില്‍ മൂന്നംഗ പ്രൊഫഷണല്‍ സംഘം

കൊച്ചി: കൊച്ചിയിലും തൃശൂരിലുമുണ്ടായ എടിഎം കവര്‍ച്ചകള്‍ക്ക് പിന്നില്‍ മൂന്നംഗ പ്രൊഫഷണല്‍ സംഘമാണെന്ന് സൂചന. ഇത് സംബന്ധിച്ച കൃത്യമായ വിവരങ്ങള്‍ പൊലീസിന് ലഭിച്ചു. എടിഎം മെഷീനുകള്‍ തകര്‍ത്ത രീതിയാണ് ഇതില്‍ ഏറ്റവും പ്രധാനപ്പെട്ടത്. ദീര്‍ഘകാലത്തെ ആസൂത്രണത്തിന് ശേഷമാണ് കവര്‍ച്ച നടത്തിയതെന്നാണ് പൊലീസിന്‍റെ പ്രാഥമിക വിലയിരുത്തല്‍.

അര്‍ധരാത്രി 12 മണിക്ക് ശേഷമാണ് കൊച്ചിയിലും തൃശൂരിലും കവര്‍ച്ച നടന്നിരിക്കുന്നത്. കൊച്ചിയിലെ ഇരുമ്പനത്ത് നിന്നും കൊള്ള നടത്തിയതിന് ശേഷം പുലര്‍ച്ചെയോടെയാണ് സംഘം ചാലക്കുടിക്ക് സമീപം കൊരട്ടിയിലെത്തിയത്. ഇവിടെ കവര്‍ച്ച നടത്തിയ പ്രതികള്‍ കോഴിക്കോട് ഭാഗത്തേക്ക് രക്ഷപ്പെട്ടുവെന്നാണ് പൊലീസ് കരുതുന്നത്. ഇരുമ്പനത്ത് നിന്നും 25 ലക്ഷവും കൊരട്ടിയില്‍ നിന്ന് 10 ലക്ഷവുമാണ് സംഘം കവര്‍ന്നത്.