നടി ആക്രമിക്കപ്പെട്ട കേസ് സിബിഐയ്ക്ക് വിടരുതെന്ന് സര്‍ക്കാര്‍

കൊച്ചി: നടിയെ ആക്രമിച്ച കേസ് സിബിഐയ്ക്ക് വിടുന്നതിനെതിരെ പ്രോസിക്യൂഷൻ കോടതിയിൽ. സിബിഐ അന്വേഷണം ആവശ്യപ്പെട്ട് നടൻ ദിലീപ് സമര്‍പ്പിച്ച ഹര്‍ജി പ്രോസിക്യൂഷൻ എതിര്‍ത്തു. കേസിന്‍റെ വിചാരണ തടസ്സപ്പെടുത്താനാണ് ദിലീപ് ഇപ്പോള്‍ സിബിഐ അന്വേഷണം ആവശ്യപ്പെടുന്നതെന്ന് അഭിഭാഷകൻ ഹൈക്കോടതിയിൽ അറിയിച്ചു.

അതേസമയം, കേസ് അന്വേഷിക്കുന്നത് സംബന്ധിച്ച് കൃത്യമായ നിലപാട് അറിയിക്കണമെന്ന് ഹൈക്കോടതി സിബിഐയോട് ആവശ്യപ്പെട്ടിട്ടുണ്ട്. ഇതേ ആവശ്യവുമായി ആഭ്യന്തര സെക്രട്ടറിയെ സമീപിച്ചിരുന്നെങ്കിലും അനുകൂല സമീപനം ഉണ്ടാകാത്ത സാഹചര്യത്തിലാണ് ദിലീപ് ഹൈക്കോടതിയിൽ ഹര്‍ജി നല്‍കിയത്.

താൻ നിരപരാധിയാണെന്നും കേസിൽ കുടുക്കിയതാണെന്നുമാണ് ദിലീപ് ഹര്‍ജിയിൽ ആരോപിക്കുന്നത്. കേസിൽ നീതിയുക്തമായ അന്വേഷണം വേണമെന്നും ഹര്‍ജിയിൽ ആവശ്യപ്പെടുന്നു.

നടി ആക്രമിക്കപ്പെട്ട കേസിൽ എട്ടാം പ്രതിയാണ് ദിലീപ്. കേസിന്‍റെ വിചാരണ എറണാകുളം ജില്ലാ സെഷൻസ് കോടതിയിലാണ് നടക്കുന്നത്.