മുഖ്യമന്ത്രിക്കെതിരെ ചെങ്ങന്നൂരിൽ ശരണം വിളിച്ച് പ്രതിഷേധം

ആലപ്പുഴ: മുഖ്യമന്ത്രിക്കെതിരെ ശരണം വിളിച്ച് പ്രതിഷേധിച്ച സ്ത്രീകളെ പോലീസ് അറസ്റ്റ് ചെയ്ത് നീക്കി. ചെങ്ങന്നൂരിൽ സഹകരണവകുപ്പിന്റെ കീഴിൽ ആരംഭിക്കുന്ന കെയർ ഹോം പദ്ധതിയുടെ ഉദ്‌ഘാടനം നിർവഹിക്കാൻ എത്തിയതായിരുന്നു മുഖ്യമന്ത്രി. മുഖ്യമന്ത്രി പ്രസംഗിക്കാൻ എഴുന്നേറ്റപ്പോൾ പിന്നിൽ നിന്ന സ്ത്രീകൾ ശരണം വിളിച്ചു തുടങ്ങി.

ബിജെപി ഇന്ന് മുഖ്യമന്ത്രിയെയും മറ്റ് മന്ത്രിമാരെയും തടയുമെന്ന് അറിയിച്ചിരുന്നതിനാൽ കനത്ത സുരക്ഷയായിരുന്നു ഒരുക്കിയിരുന്നത്. ശരണം വിളിച്ച് പ്രതിഷേധം തുടങ്ങിയപ്പോൾ താൻ ഇത് എല്ലാ ദിവസവും കേൾക്കുന്നതാണെന്നും അതിൽ വലിയ കാര്യമില്ലെന്നുമായിരുന്നു മുഖ്യമന്ത്രിയുടെ പ്രതികരണം. അതിനിടെ, നിലക്കലിൽ നിന്ന് നിരോധനാജ്ഞ ലംഘിക്കാൻ ശ്രമിച്ച ബി.ഗോപാലകൃഷ്ണൻ അടക്കമുള്ള ബിജെപി നേതാക്കളെ അറസ്റ്റ് ചെയ്ത് പിന്നീട് ജാമ്യത്തിൽ വിട്ടയച്ചു. പോലീസ് മുന്നറിയിപ്പ് നൽകിയിട്ടും പിരിഞ്ഞു പോകാതിരുന്നതിനെ തുടർന്നായിരുന്നു അറസ്റ്റ്.