തൃപ്തി ദേശായിയെ ഉപരോധിച്ച സംഭവം; 500 പേർക്കെതിരെ കേസ്

നെടുമ്പാശേരി: സുപ്രീംകോടതി വിധിയുടെ അടിസ്ഥാനത്തിൽ ശബരിമല സന്ദർശനത്തിനെത്തിയ തൃപ്തി ദേശായിയേയും സംഘത്തെയും നെടുമ്പാശേരി വിമാനത്താവളത്തിൽ ഉപരോധിച്ച 500 പേർക്കെതിരെ പോലീസ് കേസ് രജീസ്റ്റർ ചെയ്തു.

ബിജെപി സംസ്ഥാന വൈസ് പ്രസിഡന്റ് എഎൻ രാധാകൃഷ്ണൻ, ബിജെപി സംസ്ഥാന ജനറൽ സെക്രട്ടറി കെ സുരേന്ദ്രൻ, ശോഭാ സുരേന്ദ്രൻ, ബിജെപി ജില്ലാ സെക്രട്ടറി എംഎൻ ഗോപി തുടങ്ങിയ നേതാക്കൾ ഉൾപ്പെടെ കണ്ടാൽ അറിയാവുന്ന 500 പേർക്കെതിരെയാണ് കേസ്.

കനത്ത സുരക്ഷാ ക്രമീകരണങ്ങളുള്ള കൊച്ചി വിമാനത്താവളത്തിൽ ചരിത്രത്തിലാദ്യമായാണ് ഇത്രവലിയൊരു പ്രതിഷേധം അരങ്ങേറിയത്. സുരക്ഷാ ചുമതലയുള്ള സിഐഎസ്എഫിനോ പോലീസിനോ പ്രതിഷേധക്കാർക്കെതിരെ ഒന്നും ചെയ്യാനായില്ല. 17 മണിക്കൂറോളമാണ് തൃപ്തി ദേശായിയെ പ്രതിഷേധക്കാർ വിമാനത്താവളത്തിൽ തടഞ്ഞുവെച്ചത്.