തൃപ്തി ദേശായിയുടെ വീട്ടിലേക്ക് പ്രതിഷേധ മാര്‍ച്ച്

പൂനെ: ഭൂമാതാ ബ്രിഗേഡ് നേതാവ് തൃപ്തി ദേശായിയുടെ വീട്ടിലേക്ക് പ്രതിഷേധ മാര്‍ച്ച്. പൂനെയില്‍ പ്രവര്‍ത്തിക്കുന്ന അയ്യപ്പകര്‍മ്മ സമിതിയുടെ നേതൃത്വത്തിലാണ് തൃപ്തിയുടെ വീട്ടിലേക്ക് പ്രതിഷേധ മാര്‍ച്ച് സംഘടിപ്പിച്ചിരിക്കുന്നത്.

സംഘടനയിലെ മലയാളികളുടെ നേതൃത്വത്തിലാണ് മാര്‍ച്ച് സംഘടിപ്പിച്ചിരിക്കുന്നത്. തൃപ്തി മഹാരാഷ്ട്രയിലെ പൂനെയിലേക്കു തന്നെ തിരിച്ചെത്തണമെന്നും അവരെ ശബരിമലയിലേക്ക് പോകാന്‍ അനുവദിക്കില്ലെന്നും ഉന്നയിച്ചാണ് മാര്‍ച്ച് നടത്തുന്നത്. തിരിച്ചുവരാനുള്ള വിമാനം ബുക്ക് ചെയ്തതിനുശേഷമെ പ്രതിഷേധം അവസാനിപ്പിക്കുകയൂള്ളൂവെന്ന് സംഘാടകര്‍ വ്യക്തമാക്കുന്നു.

അതേസമയം പ്രതിഷേധങ്ങളെ തുടര്‍ന്ന് തിരികെ മുംബൈയിലേക്ക് തിരിക്കുമെന്ന് തൃപ്തി വ്യക്തമാക്കിയിട്ടുണ്ട്. എന്നാല്‍ മുന്‍കൂട്ടി അറിയാക്കാതെ ശബരിമലയിലേക്ക് ഇനി എത്തുമെന്ന് തൃപ്തി വ്യക്തമാക്കിയിട്ടുണ്ട്.

ഇന്നു പുലര്‍ച്ചെ 4.30 നാണ് തൃപ്തി ഇന്‍ഡിഗോ വിമാനത്തില്‍ നെടുമ്പാശ്ശേരി വിമാനത്താവളത്തില്‍ എത്തിയത്. തൃപ്തിയോടൊപ്പം ശബരിമലയിലേക്കായി ആറു സ്ത്രീകളും ഉണ്ടായിരുന്നു. എന്നാല്‍ വിമാനത്താവളത്തിനു പുറത്തുള്ള ശക്തമായ പ്രതിഷേധത്താല്‍ തൃപ്തിക്ക് പുറത്തേക്ക് എത്താന്‍ സാധിച്ചില്ലായിരുന്നു. സ്ത്രീകളടക്കമുള്ള വലിയ സംഘമാണ് ശരണം വിളിച്ച് പ്രതിഷേധിച്ചത്. സ്ഥലത്ത് വന്‍ പൊലീസ് സന്നാഹം നിലയുറപ്പിച്ചിരുന്നു. അതോടൊപ്പം നിരവധി തവണ പോലീസും റെവന്യൂ അധികൃതരും തൃപ്തിയെ അനുനയിപ്പിക്കാനുള്ള ശ്രമം നടത്തിയിരുന്നു. എന്നാല്‍ ശബരിമലയില്‍ ദര്‍ശനം നടത്തിയതിനുശേഷമേ താന്‍ തിരികെ പോകുകയൂള്ളൂ എന്ന നിലപാടില്‍ ഉറച്ചു നില്‍ക്കുകയായിരുന്നു തൃപ്തി. എയര്‍പോര്‍ട്ടിന് പുറത്തുപോകാന്‍ വാഹനം നല്‍കില്ലെന്ന നിലപാടില്‍ ടാക്സി ഡ്രൈവര്‍മാര്‍ രംഗത്തുവന്നിരുന്നു.