റിപബ്ലിക് ദിനത്തിൽ പതാകയുയര്‍ത്തൽ: സര്‍ക്കുലറുമായി പൊതുഭരണവകുപ്പ്

തിരുവനന്തപുരം: ആര്‍എസ്എസ് മേധാവി മോഹൻ ഭാഗവത് പാലക്കാട് സ്കൂളിൽ പതാകയുയര്‍ത്തുമെന്ന വാര്‍ത്തകള്‍ക്കിടെ സ്കൂളുകളിൽ പതാക ഉയര്‍ത്തുന്നതുസംബന്ധിച്ച് സര്‍ക്കുലറുമായി പൊതുഭരണവകുപ്പ്. സര്‍ക്കാര്‍ സ്ഥാപനങ്ഹളിലും സ്കൂളുകളിലും റിപബ്ലിക് ദിനത്തിൽ പതാകയുയര്‍ത്തുന്നത് സംബന്ധിച്ച മാര്‍ഗനിര്‍ദേശങ്ങളാണ് സര്‍ക്കുലറിലുള്ളത്.

പൊതുഭരണ വകുപ്പ് സെക്രട്ടറി ബിശ്വാസ്‌ സിന്‍ഹയാണ് സര്‍ക്കുലര്‍ പുറപ്പെടുവിച്ചിരിക്കുന്നത്. ത്രിതല പഞ്ചായത്തുകള്‍, സംസ്ഥാനങ്ങള്‍ എന്നിവയെല്ലാം പതാക ഉയര്‍ത്തേണ്ടതെങ്ങനെ എന്ന നിര്‍ദേശങ്ങളും സര്‍ക്കുലറിലുണ്ട്. സര്‍ക്കാര്‍,എയ്ഡഡ് സ്‌കൂളുകളില്‍ സ്‌കൂള്‍ മേധാവികള്‍ മാത്രമേ പതാക ഉയര്‍ത്താന്‍ പാടുള്ളൂവെന്നും പതാക ഉയര്‍ത്തുമ്പോൾ നിര്‍ബന്ധമായും ദേശീയഗാനം ആലപിക്കണമെന്നും സര്‍ക്കുലറിൽ പറയുന്നു.

കഴിഞ്ഞ സ്വാതന്ത്ര്യദിനത്തില്‍ പാലക്കാട് കര്‍ണകി അമ്മന്‍ സ്‌കൂളില്‍ ആര്‍എസ്എസ് മേധാവി മോഹന്‍ ഭാഗവത് പതാക ഉയര്‍ത്തിയത് വിവാദമായിരുന്നു. കൂടാതെ സ്കൂളിൽ ദേശീയഗാനത്തിനുപകരം വന്ദേമാതരമായിരുന്നു ആലപിച്ചതെന്നതും വിവാദമായി. അതേസമയം, റിപബ്ലിക് ദിനത്തിൽ മോഹൻ ഭഗവത് പതാകയുയര്‍ത്തുന്നത് അൺ-എയ്‍‍ഡഡ് സ്കൂളിലായിരിക്കുമെന്നാണ് വിവരം.