പോലീസിന്‍റെ അശ്രദ്ധ: സുനിയെ ജുഡീഷ്യല്‍ കസ്റ്റഡിയിൽ വിട്ടു

കൊച്ചി: നടിയെ ആക്രമിച്ച കേസിലെ പ്രധാന പ്രതി പൾസര്‍ സുനിയെ ചോദ്യം ചെയ്യാന്‍ വിട്ടുകിട്ടാനുള്ള പോലീസിന്‍റെ നീക്കങ്ങള്‍ക്ക് തിരിച്ചടി. വെള്ളിയാഴ്‍ച മജിസ്ട്രേറ്റിന് മുന്‍പില്‍ ഹാജരാക്കിയ സുനിയെ 14 ദിവസത്തെ ജുഡീഷ്യല്‍ കസ്റ്റഡിയില്‍ വിട്ടു.

പൊതു അവധി ദിവസമായിരുന്നതിനാല്‍ ആലുവ മജിസ്ട്രേറ്റിന്‍റെ വീട്ടിലാണ് സുനിയെയും വിജീഷിനെയും ഹാജരാക്കിയത്. പോലീസിന്‍റെയും സുനിയുടെയും അഭിഭാഷകന്‍റെയും വാദങ്ങള്‍ കേട്ടശേഷമാണ് ജുഡീഷ്യല്‍ കസ്റ്റഡിയില്‍ വിടാന്‍ മജിസ്ട്രേറ്റ് ഉത്തരവിട്ടത്. തുടര്‍ന്ന് ഇരുവരെയും കാക്കാനാട് ജയിലിലേക്ക് മാറ്റി.

കസ്റ്റഡിയില്‍ കിട്ടാനുള്ള അപേക്ഷയും പ്രതികളുടെ മെഡിക്കല്‍ റിപ്പോര്‍ട്ടും പോലീസ് ഹാജരാക്കാന്‍ വൈകിയതിനാലാണ് കസ്റ്റഡിയില്‍ വിട്ടുകൊടുക്കാതിരുന്നത്. പോലീസിന്‍റെ അപേക്ഷ നാളെ പരിഗണിക്കും.

Pulsar Suni sent to judicial custody

Aluva magistrate sent Pulsar Suni, the prime accused in actress abduction case, to 14 days judicial custody.