സുരേന്ദ്രന്റെ മകൾക്കു നേരെ അശ്ലീല പരാമർശം: യുവാവ് ഖത്തർ പോലീസ് കസ്റ്റഡിയിൽ

കൊച്ചി: ബിജെപി സംസ്ഥാന അധ്യക്ഷൻ കെ സുരേന്ദ്രന്റെ മകളെ അസഭ്യം പറഞ്ഞ പ്രവാസി കസ്റ്റഡിയിൽ. പേരാമ്പ്ര സ്വദേശി അജ്നാസിനെയാണ് ഖത്തർ പോലീസ് കസ്റ്റഡിയിലെടുത്തത്. പെൺകുട്ടിക്കെതിരെ അശ്ലീല പരാമർശം നടത്തിയ യുവാവിനെ കസ്റ്റഡിയിലെടുക്കണമെന്നാവശ്യപ്പെട്ട് ഖത്തർ ആഭ്യന്തര മന്ത്രാലയത്തിന്റെ ഫേസ്ബുക്ക് പേജിൽ ബിജെപി പ്രവർത്തകർ കൂട്ടമായെത്തി കമന്റ് ചെയ്തിരുന്നു. യുവാവിനെതിരെ നടപടിയെടുക്കണമെന്നും ഖത്തറിൽ നിന്നും പുറത്താക്കണമെന്നുമായിരുന്നു ആവശ്യം.

വിഷയത്തിൽ ഖത്തറിലെ ഇന്ത്യൻ എംബസി നടപടി തുടങ്ങിയെന്ന് കേന്ദ്ര മന്ത്രി വി മുരളീധരൻ പറഞ്ഞു. സഭ്യമല്ലാത്ത പോസ്റ്റ് നീക്കം ചെയ്തുവെന്നും അദ്ദേഹം പറഞ്ഞു. ബാലികാ ദിനത്തിൽ മകളോടൊപ്പമുള്ള ചിത്രം പങ്കുവെച്ചപ്പോഴാണ് കെ സുരേന്ദ്രന്റെ ഫേസ്ബുക്ക് പോസ്റ്റിൽ അജ്നാസ് എന്ന യുവാവ് അശ്ലീല പരാമർശം നടത്തിയത്.

ബിജെപി അധ്യക്ഷന്റെ മകളെ അസഭ്യം പറയുന്ന തെമ്മാടികളെ വെറുതേവിടില്ല: സന്ദീപ് വാര്യർ
യുവാവിന്റെ പരാമർശത്തിനെതിരെ രൂക്ഷ വിമർശനവുമായി യുവമോർച്ച നേതാവ് സന്ദീപ് വാര്യർ രംഗത്തെത്തിയിരുന്നു. പെൺകുട്ടികളെ മോശമായി അധിക്ഷേപിക്കുന്ന സൈബർ ഗുണ്ടായിസത്തിന് തടയിടണമെന്നായിരുന്നു സന്ദീപിന്റെ ആവശ്യം.

"ഫേക്ക് അക്കൗണ്ടിൽ ഒളിച്ചിരുന്ന് പുലഭ്യം പറയുന്നവർ എല്ലാ കാലത്തും സേഫ് സോണിലായിരിക്കും എന്ന് തെറ്റിദ്ധരിക്കരുത്.
ബിജെപി പ്രവർത്തകർക്കും നേതാക്കൾക്കുമെതിരെ വ്യക്തിഹത്യ നടത്തുമ്പോൾ നടപടിയെടുക്കാൻ കേരള പോലീസിന് മടിയാണ്."

"അതേ സമയം മുഖ്യമന്ത്രിക്കെതിരെ വരുന്ന ക്രിയാത്മക വിമർശനങ്ങളുടെ പേരിൽ പോലും കേസും അറസ്റ്റും ഉണ്ടാവുന്നു. ഇത് ഇരട്ട നീതിയാണ്. ബിജെപി പ്രവർത്തകരുടെയും നേതാക്കളുടെയും പെൺകുട്ടികളെ പോലും അങ്ങേയറ്റം മോശമായി ആക്ഷേപിക്കുന്ന സൈബർ ഗുണ്ടായിസത്തിന് തടയിട്ടേ മതിയാകൂ. നേതാക്കളെ പറഞ്ഞാൽ ഞങ്ങൾ സഹിക്കും. വീട്ടിലിരിക്കുന്ന കുഞ്ഞു മക്കളെ അധിക്ഷേപിച്ചാൽ വെറുതേ വിടാൻ പോകുന്നില്ല." സന്ദീപ് വാര്യർ ഫേസ്ബുക്ക് പോസ്റ്റിൽ പറഞ്ഞു.