ശബരിമല: ഗൂഢാലോചന ഇടതിന്‍റേതല്ല, തീവ്രവലതിന്‍റേതെന്ന് രാഹുല്‍ ഈശ്വര്‍

കൊച്ചി: ശബരിമല വിഷയത്തില്‍ തീവ്ര വലത് ഹിന്ദു ഗ്രൂപ്പുകളെ രൂക്ഷമായി വിമര്‍ശിച്ച് രാഹുല്‍ ഈശ്വര്‍. ശബരിമല സ്ത്രീപ്രവേശനവുമായി ബന്ധപ്പെട്ട കേസിന് പിന്നില്‍ തീവ്ര വലത് ഗൂഢാലോചനയുണ്ടെന്ന് രാഹുല്‍ ഈശ്വര്‍ ആരോപിച്ചു. ഇടത് ലിബറലുകളാണ് ഇതിന് പിന്നിലെന്നാണ് താന്‍ കരുതിയത്. എന്നാല്‍ ഇപ്പോഴാണ് വസ്തുത മനസിലായതെന്നും രാഹുല്‍ കൊച്ചിയില്‍ നടത്തിയ വാര്‍ത്താ സമ്മേളനത്തില്‍ വ്യക്തമാക്കി.

ശബരിമലയെ മുന്‍നിര്‍ത്തി എല്ലാ മതങ്ങളുടേയും ആരാധനാലയങ്ങളിലേക്ക് കയറിച്ചെല്ലാനാണ് ഗൂഢാലോചന നടത്തിയത്. ഇതിന് പിന്നില്‍ ഇടതുപക്ഷമോ മുസ്ലീങ്ങളോ ക്രിസ്ത്യാനികളോ അല്ല. ഹിന്ദു സമൂത്തിലെ തന്നെ സവര്‍ണ വിഭാഗത്തിലെ ബ്രാഹ്മണിക്കല്‍ ചിന്താധാരയുടെ ഭാഗമായവരാണെന്നും രാഹുല്‍ ഈശ്വര്‍ തുറന്നടിച്ചു. യൂണിഫോം സിവില്‍ കോഡാണ് ഇവരുടെ ലക്ഷ്യം. ഈ നീക്കത്തിന്‍റെ ആദ്യപടിയാണ് ശബരിമലയെന്നും അദ്ദേഹം ആരോപിച്ചു.