കോൺഗ്രസിലെ കലാപത്തിൽ വിശദീകരണം തേടി രാഹുൽ ഗാന്ധി

തിരുവനന്തപുരം: രാജ്യസഭാ സീറ്റ് കേരളാ കോൺഗ്രസിന് നല്‍കിയതിൽ പ്രതിഷേധിച്ച് കോൺഗ്രസിനുള്ളിൽ രൂപപ്പെട്ട പ്രശ്നങ്ങളിൽ വിശദീകരണം ആവശ്യപ്പെട്ട് കോൺഗ്രസ് അധ്യക്ഷൻ രാഹുൽ ഗാന്ധി. സംസ്ഥാന കോൺഗ്രസ് നേതൃത്വത്തിന്‍റെ തീരുമാനത്തിൽ അസംതൃപ്തി രേഖപ്പെടുത്തി നിരവധി പരാതികളാണ് രാഹുൽ ഗാന്ധിയ്ക്ക് എത്തിയിരിക്കുന്നത്.

ജോസ് കെ മാണി സ്ഥാനാര്‍ഥിയായി തീരുമാനിക്കപ്പെട്ടതിനു പിന്നാലെ ഷാനിമോല്‍ ഉസ്മാൻ രാഹുൽ ഗാന്ധിയെ ബന്ധപ്പെട്ട് പ്രതിഷേധം അറിയിച്ചിരുന്നു. സീറ്റ് വിട്ടുകൊടുത്തത് വലിയ ദുരന്തമായെന്നും ജനവികാരം അറിയാതെ എടുത്ത തീരുമാനമാണെന്നും ഷാനിമോള്‍ ഉസ്മാൻ പറഞ്ഞു. സംസ്ഥാന നേതൃത്വത്തിന്‍റെ തീരുമാനത്തെ പരിഹസിച്ച് ശബരീനാഥൻ എംഎൽഎയും രംഗത്തെത്തിയിട്ടുണ്ട്.

ഇതിനിടെ സംസ്ഥാനത്ത് കോൺഗ്രസിൽ നേതൃമാറ്റം ആവശ്യപ്പെട്ട് വി ടി ബൽറാം രംഗത്തെത്തി. കോൺഗ്രസിനെ സ്നേഹിക്കുന്നവരെ സംബന്ധിച്ച് തീരുമാനം അപമാനകരമാണെന്ന് ബൽറാം ഫേസ്ബുക്ക് പോസ്റ്റിൽ കുറിച്ചു.