വിമാനമോഡൽ ടിക്കറ്റിങ് ട്രെയിനിൽ വേണ്ടെന്ന് റയിൽവേ മന്ത്രി

ന്യൂഡൽഹി: വിമാനടിക്കറ്റിങിന് സമാനമായി ഡൈനാമിക് പ്രൈസിങ് ട്രെയിനുകളിലും അവതരിപ്പിക്കണമെന്ന നിര്‍ദേശം റയിൽവേ തള്ളി. നിര്‍ദേശം പുനപരിശോധിക്കണമെന്ന് ഫ്ലെക്സി നിരക്കിനെപ്പറ്റി അവലോകനം നടത്താൻ നിയോഗിച്ച കമ്മിറ്റിയോട് റയിൽവേ മന്ത്രി പീയുഷ് ഗോയൽ ആവശ്യപ്പെട്ടു.

വിമാനടിക്കറ്റുകള്‍ക്ക് സമാനമായി കുറഞ്ഞ സമയത്തിനുള്ളിൽ യാത്ര ചെയ്യാവുന്ന ട്രെയിനുകള്‍ക്ക് അധികതുക, ലോവര്‍ ബെര്‍ത്തിനും അപ്പര്‍ ബെര്‍ത്തിനും വ്യത്യസ്ത നിരക്കുകള്‍, തിരക്കുള്ള സീസണുകളിൽ കൂടിയ നിരക്ക് എന്നിങ്ങനെ യാത്രാനിരക്ക് നിശ്ചയിക്കാനായിരുന്നു കമ്മിറ്റിയുടെ ശുപാര്‍ശ. ജനുവരി 15ന് എല്ലാ മെയിൽ, എക്സ്പ്രസ് തീവണ്ടികളിലും ഡൈനാമിക് പ്രൈസിങ് കൊണ്ടുവരാനായിരുന്നു നിര്‍ദേശം. പ്രീമിയം ട്രെയിനുകള്‍ക്കും ബുക്ക് ചെയ്യുന്നതിന്‍റെ തൊട്ടടുത്ത ദിവസത്തെ തീവണ്ടികള്‍ക്കും ഉയര്‍ന്ന നിരക്കും ശുപാര്‍ശ ചെയ്തിരുന്നു.

മാര്‍ച്ച് 13 ന് ചേര്‍ന്ന യോഗത്തില്‍ കമ്മറ്റി റിപ്പോര്‍ട്ടില്‍ മന്ത്രി അതൃപ്തി അറിയിച്ചതായി പി.ടി.ഐ റിപ്പോര്‍ട്ടുചെയ്തു. ഡൈനാമിക് പ്രൈസിങ് സംബന്ധിച്ച കമ്മിറ്റി നിര്‍ദേശം പുനപരിശോധിക്കാനാണ് മന്ത്രിയുടെ നിര്‍ദേശം. ഈ സംവിധാനം റെയിൽവേയ്ക്ക് നേട്ടമാണെന്നാണ് മന്ത്രാലയത്തിലെ ഉന്നത ഉദ്യോഗസ്ഥരുടെ പക്ഷം.