ഓഖി: രാജ്ഭവനിലേക്ക് ലത്തീൻ സഭയുടെ നേതൃത്വത്തിൽ മാർച്ച്

തിരുവനന്തപുരം: ഓഖി ചുഴലിക്കാറ്റിൽ കാണാതായവരെ കണ്ടെത്തണമെന്ന് ആവശ്യപ്പെട്ട് ലത്തീൻ സഭയുടെ നേതൃത്വത്തിൽ രാജ്ഭവനിലേക്ക് മാർച്ച് നടത്തി. പാളയം സെന്‍റ് ജോസഫ് ദേവാലയത്തിൽ നിന്നാണ് മാർച്ച് ആരംഭിച്ചത്. പൂവാർ മുതൽ മാമ്പിള്ളി വരെയുള്ള തീരദേശങ്ങളിൽ നിന്നുള്ള നൂറുകണക്കിന് മത്സ്യത്തൊഴിലാളികളാണ് മാർച്ചിൽ പങ്കെടുത്തത്. ആർച്ച് ബിഷപ്പ് ഡോ.സൂസപാക്യം മാർച്ച് ഉദ്ഘാടനം ചെയ്തു.

കേന്ദ്ര, സംസ്ഥാനങ്ങളുടെ പ്രവർത്തനങ്ങളിൽ അതൃപ്തിയുണ്ടെന്ന് സൂസപാക്യം പറഞ്ഞു. 150 ഓളം മത്സ്യത്തൊഴിലാളികളെ സർക്കാരിന് കണ്ടെത്താൻ കഴിയാത്തതാണ് സഭയുടെ നേതൃത്വത്തിൽ ഇത്തരമൊരു പ്രതിഷേധത്തിന് കാരണം. രക്ഷാപ്രവർത്തനം നടത്തുന്നതിൽ സർക്കാർ പരാജയപ്പെട്ടു.

ഓഖി ദേശീയ ദുരന്തമായി പ്രഖ്യാപിക്കണമെന്ന് ലത്തീൻ അതിരൂപതാ വികാരി ജനറൽ ഫാ. യൂജിൻ പെരേര പറഞ്ഞു. കടലിൽ ഒറ്റപ്പെട്ടുപോയ അവസാനത്തെ ആളെ വരെ രക്ഷപെടുത്തി കൊണ്ട് വന്നില്ലെങ്കിൽ രാപ്പകൽ സമരം തുടങ്ങുമെന്നും യൂജിൻ പെരേര പറഞ്ഞു. ഒമാൻ ഉൾപ്പടെയുള്ള വിദേശരാജ്യങ്ങളുടെ സഹായത്തോടെ പത്ത് ദിവസം കൂടെ തെരച്ചിൽ തുടരുമെന്ന് മുഖ്യമന്ത്രി അറിയിച്ചു.