മുഖ്യമന്ത്രി സ്ഥാനം ഉമ്മൻ ചാണ്ടിയുമായി പങ്കുവെയ്ക്കുമെന്ന വാർത്ത മാധ്യമ സൃഷ്ടി മാത്രം: ചെന്നിത്തല

ന്യൂഡൽഹി: നിമയസഭാ തെരഞ്ഞെടുപ്പിൽ അധികാരത്തിലെത്തിയാൽ താനും ഉമ്മൻ ചാണ്ടിയും മുഖ്യമന്ത്രി സ്ഥാനം പങ്കുവെയ്ക്കുമെന്ന വാർത്ത മാധ്യമ സൃഷ്ടിയെന്ന് രമേശ് ചെന്നിത്തല. അത്തരത്തിൽ ഒരു ചർച്ചയും പാർട്ടിക്കുള്ളിൽ നടന്നിട്ടില്ലെന്നും രമേശ് ചെന്നിത്തല പറഞ്ഞു.

അധികാരം പങ്കുവെയ്ക്കുമെന്ന വാർത്ത മാധ്യമ സൃഷ്ടിയാണ്. അന്തരീക്ഷത്തിൽ അത്തരം അനാവശ്യമായ പ്രചാരണങ്ങൾ നടക്കുന്നുണ്ട്. യുഡിഎഫ് ഒറ്റക്കെട്ടായി തെരഞ്ഞെടുപ്പിനെ നേരിടുമെന്നും രമേശ് ചെന്നിത്തല പറഞ്ഞു.

അതേസമയം, തെരഞ്ഞെടുപ്പ് തയ്യാറെടുപ്പുകൾ വിലയിരുത്തുന്നതിന് കോൺഗ്രസ് കേരള നേതൃത്വവുമായിട്ടുള്ള ഹൈക്കമാൻഡിന്റെ കൂടിക്കാഴ്ച തിങ്കളാഴ്ച നടക്കും. ഇതിനായി രമേശ് ചെന്നിത്തല ഡൽഹിയിലെത്തി. ഉമ്മൻ ചാണ്ടിയും മുല്ലപ്പള്ളി രാമചന്ദ്രനും ഉടനെത്തും.

സംസ്ഥാനത്തിന്റെ ചുമതലയുള്ള താരിഖ് അൻവർ, സംഘടനാകാര്യ ജനറൽ സെക്രട്ടറി കെസി വേണുഗോപാൽ എന്നിവർ ഹൈക്കമാന്റിനെ പ്രതിനിധീകരിച്ച് കേരളത്തിലെ നേതാക്കളുമായി കൂടിക്കാഴ്ച നടത്തും.