ശ്രീധരന്‍ പിള്ള കേന്ദ്രത്തെ രക്ഷിക്കാനായി സംസാരിക്കുന്നുവെന്ന് ചെന്നിത്തല

തിരുവനന്തപുരം: ബിജെപി സംസ്ഥാന അധ്യക്ഷന്‍ ശ്രീധരന്‍ പിള്ളയ്ക്ക് മറുപടിയുമായി പ്രതിപക്ഷ നേതാവ് രമേഷ് ചെന്നിത്തല. ശബരിമല വിഷയത്തില്‍ കേന്ദ്ര സര്‍ക്കാരിന് ഇടപെടാന്‍ കഴിയില്ലെന്ന ശ്രീധരന്‍ പിള്ളയുടെ വാദത്തിനെതിരെയാണ് ചെന്നിത്തല രംഗത്തു വന്നിരിക്കുന്നത്.

കേരള നിയമസഭയില്‍ പ്രമേയം പാസാക്കിയാല്‍ മാത്രമേ ഒാര്‍ഡിനന്‍സ് ഇറക്കാന്‍ സാധിക്കൂ എന്ന വാദം തെറ്റാണ്. അത് നിയമപരമല്ല. ഇക്കാര്യത്തില്‍ കേന്ദ്രത്തിന് ഒാര്‍ഡിനന്‍സ് ഇറക്കാന്‍ സാധിക്കുമെന്നും ചെന്നിത്തല വ്യക്തമാക്കുന്നു.

ശബരിമല സ്ത്രീ പ്രവേശന വിഷയത്തില്‍ സര്‍ക്കാര്‍ അവരുടെ നിലപാട് വ്യക്തമാക്കി കഴിഞ്ഞു. കണ്‍കറന്‍റ് ലിസ്റ്റായതുകൊണ്ട് കേന്ദ്ര സര്‍ക്കാരിന് ഒാര്‍ഡിനന്‍സ് ഇറക്കാന്‍ സാധിക്കും. കേന്ദ്ര സര്‍ക്കാരിന് നിയമ നിര്‍മ്മാണം നടത്താനുള്ള സാധ്യതയാണ് ഇവിടെ തെളിയുന്നത്. ശബരിമല വിഷയത്തില്‍ ആര്‍ട്ടിക്കിള്‍ 252 വിന് യാതൊരു പ്രസക്തിയുമില്ലെന്നും ചെന്നിത്തല കൂട്ടിച്ചേര്‍ത്തു.

സംസ്ഥാനവുമായി ബന്ധപ്പെട്ട വിഷയത്തില്‍ കേന്ദ്ര സര്‍ക്കാര്‍ ഇടപെടണമെങ്കില്‍ നിയമസഭാ സമ്മേളനം വിളിച്ചു ചേര്‍ത്ത് കേന്ദ്രത്തോട് ആവശ്യപ്പെടണമെന്നായിരുന്നു ശ്രീധരന്‍ പിള്ള വ്യക്തമാക്കിയത്. ഭരണഘടനയിലെ ആര്‍ട്ടിക്കിള്‍ 252 പ്രകാരം സംസ്ഥാന വിഷയത്തില്‍ കേന്ദ്രത്തിന് ഇടപെടാന്‍ സാധിക്കില്ല. എന്നാല്‍ ഇതിന് സഹായകമാകുന്ന തരത്തില്‍ നിയമസഭ വിളിച്ചു കൂട്ടാന്‍ ഭരണകക്ഷിയും പ്രതിപക്ഷവും തയ്യാറാകണമെന്ന് ശ്രീധരന്‍ പിള്ള പറഞ്ഞിരുന്നു.