കേരളത്തെ സര്‍ക്കാര്‍ ഇരുട്ടിലേക്ക് നയിക്കുന്നുവെന്ന് ചെന്നിത്തല

തിരുവനന്തപുരം: ഇടതുമുന്നണി സര്‍ക്കാരിനെ രൂക്ഷമായി വിമര്‍ശിച്ച് പ്രതിപക്ഷ നേതാവ് രമേശ് ചെന്നിത്തല. സംസ്ഥാന സര്‍ക്കാര്‍ കേരളത്തെ ഇരുണ്ട കാലഘട്ടത്തിലേക്ക് നയിക്കുകയാണെന്ന് രമേശ് ചെന്നിത്തല കുറ്റപ്പെടുത്തി. സര്‍ക്കാര്‍ എന്ന നിലയില്‍ യാതൊരു പ്രവര്‍ത്തനവും നടത്താന്‍ സാധിക്കുന്നില്ല. ജനങ്ങള്‍ക്കിടയില്‍ വര്‍ഗ്ഗീയതയും വിദ്വേഷവും വളര്‍ത്താനാണ് സര്‍ക്കാര്‍ ശ്രമിക്കുന്നത്. ബിജെപിയും ഇടതുപക്ഷവും ചേര്‍ന്ന് ശബരിമലയെ കലാപഭൂമിയാക്കുകയാണെന്നും ചെന്നിത്തല ആരോപിച്ചു.

സാലറി ചലഞ്ചിന് പിന്നാലെ പോകുന്നതല്ലാതെ പ്രളയബാധിതരെ യാതൊരു തരത്തിലും സഹായിക്കാന്‍ സര്‍ക്കാര്‍ തയ്യാറാകുന്നില്ല. സാലറി ചലഞ്ചിലൂടെ സര്‍ക്കാര്‍ ജീവനക്കാര്‍ക്കിടയില്‍ വേര്‍തിരിവുണ്ടാക്കി തമ്മിലടിപ്പിക്കുകയാണ്. പ്രളയബാധിതര്‍ക്ക് പ്രഖ്യാപിച്ച 10,000 രൂപ പോലും കൊടുത്തുതീര്‍ക്കാന്‍ ഇനിയും സര്‍ക്കാരിന് കഴിഞ്ഞിട്ടില്ലെന്നും ചെന്നിത്തല കുറ്റപ്പെടുത്തി. കേരളപ്പിറവി ദിനത്തില്‍ ജീവനക്കാര്‍ക്ക് ശമ്പളം കിട്ടാതിരിക്കുന്നത് ചരിത്രത്തിലെ ആദ്യത്തെ സംഭവമാണെന്നും പ്രതിപക്ഷ നേതാവ് ചൂണ്ടിക്കാട്ടി. രാവിലെ തിരുവനന്തപുരത്ത് നടത്തിയ വാര്‍ത്താസമ്മേളനത്തിലാണ് ചെന്നിത്തല സര്‍ക്കാരിനെതിരെ ആഞ്ഞടിച്ചത്.