സംസ്ഥാനങ്ങളുടെ ചുമതലയുള്ള ജനറല്‍ സെക്രട്ടറി സ്ഥാനത്തേക്കാണ് ചെന്നിത്തലയെ പരിഗണിക്കുന്നത് എന്നാണ് റിപ്പോര്‍ട്ട്. കോൺഗ്രസ് പ്രവര്‍ത്തക സമിതിയിൽ അംഗമാക്കാനോ ദേശീയ നേതൃത്വത്തിലേക്ക് കൊണ്ടു വരാനാണ് പാര്‍ട്ടി തലപ്പത്ത് ആലോചനയുണ്ട്.
ചെന്നത്തലയ്ക്ക് പ്രവര്‍ത്തന പരിചയം
യൂത്ത് കോണ്‍ഗ്രസ് ദേശീയ അധ്യക്ഷനായും എംപിയായും ഡൽഹി രാജ്യതലസ്ഥാനത്ത് പ്രവര്‍ത്തിച്ച് പരിചയം ചെന്നിത്തലയ്ക്ക് ഉണ്ട്. ദേശീയ നേതാക്കളുമായി പ്രവര്‍ത്തിച്ച് പരിചയവും ഹിന്ദി ഭാഷയിലെ പ്രാവീണ്യവും ചെന്നിത്തലയ്ക്കുണ്ട്. നിയമസഭാ തെരഞ്ഞെടുപ്പിൽ യുഡിഎഫിനും കോണ്‍ഗ്രസിനുമുണ്ടായ പരാജയത്തിന്റെ പശ്ചാത്തലത്തിലാണ് കേരളത്തിലെ പാര്‍ട്ടി തലപ്പത്ത് മാറ്റം വരുത്തുന്നതിന് ദേശീയ നേതൃത്വം ആലോചിക്കുന്നത്. ചെന്നിത്തലയുടെ മാറ്റത്തോടെ കെപിസിസി അധ്യക്ഷസ്ഥാനവും മാറിയേക്കുമെന്നാണ് സൂചന.
പുതിയ പ്രതിപക്ഷ നേതാവ്
പ്രതിപക്ഷ നേതൃസ്ഥാനത്ത് നിന്നും ചെന്നിത്തല മാറുന്നതോടെ വി ഡി സതീശന്റെ പേരാണ് പ്രധാനമായും ഉയര്‍ന്ന് കേള്‍ക്കുന്നത്. അതിന് പുറമെ, പി ടി തോമസ്, തിരുവഞ്ചൂര്‍ രാധാകൃഷ്ണൻ, ഷാഫി പറമ്പിൽ എന്നിവരുടെ പേരുകളും ഈ പദവിയിലേക്ക് ഉയര്‍ന്ന് കേട്ടിരുന്നു. അതേസമയം, കെപിസിസി അധ്യക്ഷ സ്ഥാനത്തേക്ക് ക. സുധാകരന്റെ പേരാണ് സജീവ പരിഗണനയിലുള്ളത്. കെ മുരളീധരനും ഈ സ്ഥാനത്തിന് താത്പര്യം പ്രകടിപ്പിച്ചിട്ടുണ്ടെന്നാണ് റിപ്പോര്‍ട്ട്. അതേസമയം, ഇത്തരത്തിൽ ഒരു ആലോചന നിലവിൽ ഇല്ലെന്നാണ് ചെന്നിത്തല ക്യാംപിനെ ഉദ്ധരിച്ച് മാധ്യമങ്ങള്‍ റിപ്പോര്‍ട്ട് ചെയ്യുന്നത്.
സംസ്ഥാന നേതൃത്വത്തിന്റെ വീഴ്ച
സംസ്ഥാന തെരഞ്ഞെടുപ്പിൽ പാര്‍ട്ടിക്കുണ്ടായ കനത്ത തിരിച്ചടിക്ക് കാരണം സംസ്ഥാനത്തെ കോണ്‍ഗ്രസ് നേതൃത്വത്തിന്റെ വീഴ്ചയാണെന്ന് താരിഖ് അൻവര്‍ ഹൈക്കമാന്റിന് റിപ്പോര്‍ട്ട് നൽകിയിരുന്നു. ഇടതുപക്ഷത്തെ നേരിടാൻ താഴേതട്ടിൽ സംഘടനാ സംവിധാനം പര്യാപ്തമായിട്ടില്ലെന്നും താരിഖ അൻവര്‍ റിപ്പോര്‍ട്ടിൽ ചൂണ്ടിക്കാണിക്കുന്നു. കേരള നേതൃത്വത്തെ പൂര്‍ണമായും പ്രതിക്കൂട്ടിൽ നിര്‍ത്തുന്ന റിപ്പോര്‍ട്ടാണ് താരിഖ് അൻവര്‍ സമര്‍പ്പിച്ചത്.
സോണിയാ ഗാന്ധിയുടെ വിമര്‍ശനം
അഞ്ച് സംസ്ഥാനങ്ങളിലെ നിയമസഭാ തെരഞ്ഞെടുപ്പിൽ പാര്‍ട്ടിക്കുണ്ടായ തിരിച്ചടി വലിയ പാഠമായി കാണണമെന്ന് കഴിഞ്ഞ ദിവസം ചേര്‍ന്ന കോണ്‍ഗ്രസ് പ്രവര്‍ത്തക സമിതി യോഗത്തിൽ സോണിയാ ഗാന്ധി പറഞ്ഞിരുന്നു. തൊലിപ്പുറത്തുള്ള ചികിത്സ കൊണ്ട് കാര്യമില്ലെന്നും അവര്‍ യോഗത്തിൽ തുറന്നടിച്ചിരുന്നു.