ഹാരിസണ്‍; സര്‍ക്കാര്‍ ചോദിച്ചു വാങ്ങിയ പരാജയമെന്ന് ചെന്നിത്തല

തിരുവനന്തപുരം: ഹാരിസണ്‍ കേസിലെ പരാജയം സര്‍ക്കാര്‍ ചോദിച്ചുവാങ്ങിയതെന്ന് പ്രതിപക്ഷ നേതാവ് രമേശ് ചെന്നിത്തല. ഇടതുമുന്നണി സര്‍ക്കാര്‍ അധികാരത്തിലെത്തിയതിന് ശേഷം ഹാരിസണ് വേണ്ടിയുള്ള കള്ളക്കളിയാണ് നടക്കുന്നതെന്നും രമേശ് ചെന്നിത്തല ആരോപിച്ചു.ഹാരിസണ്‍ കമ്പനി കൈവശം വെച്ചിരുന്ന ഭൂമി തിരിച്ചുപിടിക്കാനുള്ള സര്‍ക്കാര്‍ ഉത്തരവ് നേരത്തേ ഹൈക്കോടതി റദ്ദാക്കിയിരുന്നു. ഇതിനെതിരെ സുപ്രീം കോടതിയില്‍ നല്‍കിയ ഹര്‍ജിയും തള്ളിയ സാഹചര്യത്തിലാണ് ചെന്നിത്തലയുടെ വിമര്‍ശനം.

38,000 ഏക്കര്‍ സര്‍ക്കാര്‍ ഭൂമിയാണ് ഹാരിസണ്‍ മലയാളം അനധികൃതമായി കൈവശം വെച്ചിരിക്കുന്നത്. പാട്ടക്കരാര്‍ റദ്ദാക്കി ഇത് തിരിച്ചുപിടിക്കാനായിരുന്നു സര്‍ക്കാര്‍ ശ്രമം. സ്പെഷ്യല്‍ ഓഫീസറെ വെച്ച് ഭൂമി സര്‍ക്കാര്‍ ഏറ്റെടുക്കുകയും ചെയ്തു. എന്നാല്‍ ഈ നടപടി ജസ്റ്റിസ് റോഹിത്ത് നരിമാന്‍ അദ്ധ്യനായ ബെഞ്ച് തള്ളുകയായിരുന്നു.