സുപ്രീംകോടതിയുടെ തീരുമാനം സ്വാഗതാര്‍ഹമെന്ന് ചെന്നിത്തല

തിരുവനന്തപുരം: ശബരിമല യുവതി പ്രവേശനത്തിന്മേലുള്ള സുപ്രീംകോടതിയുടെ തീരുമാനം സ്വാഗതാര്‍ഹമെന്ന് പ്രതിപക്ഷ നേതാവ് രമേഷ് ചെന്നിത്തല. നിലവിലെ സാഹചര്യങ്ങള്‍ കോടതിക്കു ബോധ്യപ്പെട്ടിട്ടുണ്ടെന്നാണ് തന്‍റെ വിശ്വാസമെന്നും ചെന്നിത്തല പറഞ്ഞു.

ശബരിമലയില്‍ സ്ത്രീ പ്രവേശനം നടപ്പാക്കാനുള്ള തീരുമാനം സര്‍ക്കാര്‍ ഒഴിവാക്കണം. ശബരിമല തീര്‍ത്ഥാടനത്തെ സംഘര്‍ഷഭൂമിയാക്കി മാറ്റാതിരിക്കാനുള്ള നടപടികള്‍ സര്‍ക്കാര്‍ സ്വീകരിക്കണമെന്നും ചെന്നിത്തല ആവശ്യപ്പെട്ടു.

ശബരിമല കേസിലെ ഗൗരവം കണക്കിലെടുത്താണ് കോടതി തുടര്‍വാദം കോള്‍ക്കാന്‍ തയ്യാറായത്. ഭക്തജനങ്ങളുടെ വികാരങ്ങളെ സുപ്രീംകോടതി മനസിലാക്കുന്നു എന്നുള്ളതിന്‍റെ സൂചനയാണെന്നും ചെന്നിത്തല വ്യക്തമാക്കി.

ശബരിമല വിധിക്കെതിരായ റിവ്യു ഹര്‍ജികള്‍ സുപ്രീം കോടതി ജനുവരി 22ന് പരിഗണിക്കുെമെന്നുള്ള ഉത്തരവാണ് ഇന്ന് സുപ്രീംകോടതി പുറപ്പെടുവിച്ചത്. റിവ്യു ഹര്‍ജികള്‍ തുറന്ന കോടതിയില്‍ കേള്‍ക്കണമെന്ന ആവശ്യം കോടതി അംഗീകരിച്ചു. ഇതോടൊപ്പം റിട്ട് ഹര്‍ജികളും കോടതി പരിഗണിക്കും. എ.എം. ഖാന്‍വില്‍ക്കര്‍, രോഹിന്റണ്‍ നരിമാന്‍, ഡി.വൈ. ചന്ദ്രചൂഡ്, ഇന്ദു മല്‍ഹോത്ര എന്നിവരടങ്ങിയ ബെഞ്ചിന്‍റേതാണ് ഉത്തരവ്.