ബിനോയ് കോടിയേരിക്കെതിരെയുള്ള പരാതി; സത്യസന്ധമായ അന്വേഷണം വേണം: മുല്ലപ്പള്ളി

തിരുവനന്തപുരം: സ്ത്രീ സുരക്ഷയെപ്പറ്റിയും നവോത്ഥാനത്തെക്കുറിച്ചും പറയുന്ന സിപിഎമ്മിന് ബിനോയ് കോടിയേരിക്കെതിരെയുള്ള പീഡന ആരോപണത്തെക്കുറിച്ച് അന്വേഷിക്കാൻ ധാർമിക ഉത്തരവാദിത്വമുണ്ടെന്ന് കെപിസിസി പ്രസിഡന്റ് മുല്ലപ്പള്ളി രാമചന്ദ്രൻ. രാഹുൽ ഗാന്ധിയുടെ ജന്മദിനാഘോഷങ്ങൾക്കു ശേഷം തിരുവനന്തപുരത്ത് സംസാരിക്കുകയായിരുന്നു അദ്ദേഹം.

സദാചാരത്തെക്കുറിച്ച് നിരന്തരം പറയുന്ന സിപിഎം നേതാക്കൾ ഈ സംഭവത്തിൽ പ്രതികരിക്കണം. കോടിയേരി ബാലകൃഷ്ണൻ ആഭ്യന്തര മന്ത്രിയായിരിക്കെ മക്കൾക്കെതിരെ നിരവധി ആരോപണങ്ങൾ ഉയർന്നിരുന്നു. എന്നാൽ അവയെല്ലാം പരവതാനിക്കുള്ളിൽ മറയ്ക്കപ്പെട്ടുവെന്ന് മുല്ലപ്പള്ളി പറഞ്ഞു. ബിനോയിക്കെതിരെയുള്ള പരാതിയിൽ സത്യസന്ധമായ അന്വേഷണം നടക്കണമെന്നും മുല്ലപ്പള്ളി വ്യക്തമാക്കി.

സ്ത്രീ പീഡിപ്പിക്കപ്പെടേണ്ടവളല്ലെന്നും ഇത് ഒരു സ്വകാര്യ പ്രശ്നം അല്ലെന്നും മുല്ലപ്പള്ളി പറഞ്ഞു. കുറ്റക്കാരെ നിയമത്തിനു മുന്നിലെത്തിക്കാൻ കർശ്ശന നടപടി വേണമെന്നും മുല്ലപ്പള്ളി പറഞ്ഞു.

അതേസമയം, കേരളാ കോൺഗ്രസ് വിഷയത്തിൽ സമവായ സാധ്യതകൾ അടഞ്ഞിട്ടില്ലെന്നും പ്രശ്നം പരിഹരിക്കാൻ കഴിയുമെന്നും മുല്ലപ്പള്ളി മാധ്യമപ്രവർത്തകരോട് പറഞ്ഞു. കേരളാ കോൺഗ്രസ് ഒറ്റക്കെട്ടായി മുന്നോട്ട് പോകേണ്ടത് യുഡിഎഫിന്റെ ആവശ്യമാണെന്നും മുല്ലപ്പള്ളി കൂട്ടിച്ചേർത്തു.