പീഡനക്കേസ് പ്രതി ജയിലിൽ സ്വന്തം ലിംഗം ബ്ലേഡ് കൊണ്ട് ഛേദിച്ചു

ഇടുക്കി: പീരുമേട് സബ് ജയിലിൽ പീഡനക്കേസ് പ്രതി സ്വന്തം ജനനേന്ദ്രിയം ബ്ലേഡ് ഉപയോഗിച്ച് ഛേദിച്ചു. സ്വന്തം മകളെ പീഡിപ്പിച്ചെന്ന കേസിൽ റിമാൻഡിൽ കഴിയുന്ന 42കാരനായ വണ്ടിപ്പെരിയാര്‍ സ്വദേശിയാണ് സ്വന്തം ലിംഗം ഛേദിച്ചത്. ഷേവ് ചെയ്യാനായി ജയിൽ അധികൃതര്‍ കൊടുത്ത ബ്ലേഡാണ് ഇയാള്‍ ഉപയോഗിച്ചത്.

ജയിൽ അധികൃതര്‍ പോലീസിന്‍റെ സഹായത്തോടെ ഉടൻ തന്നെ ഇയാളെ പീരുമേട് താലൂക്ക് ആശുപത്രിയിലും പിന്നീട് കോട്ടയം മെഡിക്കൽ കോളേജ് ആശുപത്രിയിലും പ്രവേശിപ്പിച്ചു. ഇയാളുടെ ശരീരഭാഗം തുന്നിച്ചേര്‍ക്കാൻ സാധിച്ചതായും അപകടനില തരണം ചെയ്തതായും ഡോക്ടര്‍മാര്‍ അറിയിച്ചു.

ജയിലിലെ നിയമപ്രകാരം ചൊവ്വാഴ്ചകളിൽ ജയിൽപുള്ളികള്‍ക്ക് ഷേവ് ചെയ്യാനായി അധികൃതര്‍ ഷേവിങ് ഉപകരണങ്ങള്‍ നല്‍കാറുണ്ട്. നാല് മാസം മുൻപാണ് മകളെ ലൈംഗികമായി പീഡിപ്പിച്ചെന്ന കേസിൽ ഇയാള‍് അറസ്റ്റിലായത്. കോടതി ജാമ്യം അനുവദിച്ചെങ്കിലും ജാമ്യവ്യവസ്ഥകള്‍ക്ക് മുൻകൈയെടുക്കാൻ ആരും എത്താതിരുന്നതിനെത്തുടര്‍ന്ന് ഇയാള്‍ ജയിലിൽ തുടരുകയായിരുന്നു.

താൻ കുറ്റം ചെയ്തിട്ടില്ലെന്ന് ഇയാള്‍ പറഞ്ഞിരുന്നതായി ജയിൽ വൃത്തങ്ങളെ ഉദ്ധരിച്ച് ടൈംസ് ഓഫ് ഇന്ത്യ റിപ്പോര്‍ട്ട് ചെയ്തു. ജയിൽ അധികൃതര്‍ അറിയിച്ചതനുസരിച്ച് ഇയാളെ കോട്ടയം മെഡിക്കൽ കോളേജിൽ പ്രവേശിപ്പിക്കാൻ തങ്ങള്‍ സഹായിക്കുകയായിരുന്നുവെന്ന് പീരുമേട് എസ്ഐ രാജേഷ് പറഞ്ഞു.