റേഷൻ കടയിൽ അരി എത്തിയോ എന്ന് മെസേജിലൂടെ അറിയാം

തിരുവനന്തപുരം: റേഷൻ കടയിൽ അരി എത്തിയാൽ നിങ്ങളുടെ മൊബൈൽ ഫോണിൽ ഇനി മെസേജ് വരും. റേഷൻ കടയിൽ നിന്ന് എത്രത്തോളം ഭക്ഷ്യ സാധനങ്ങൾ നൽകി, എത്ര ഇനി ബാക്കിയുണ്ട്, ഏതൊക്കെ ഉപഭോക്താക്കൾ സാധനങ്ങൾ വാങ്ങി ഇവയെല്ലാം ഇനി സോഫ്‌ട്‍വെയറിൽ കൃത്യമായി ചേർക്കുന്നതോടെ ഇവയെല്ലാം എപ്പോഴും കമ്പ്യൂട്ടറില്‍ ലഭ്യമാകും.

ഏപ്രിലോടെ കേരളത്തിലെ റേഷൻ സംവിധാനം പൂർണമായും ഡിജിറ്റലായി മാറും. റേഷൻ വിതരണം കാര്യക്ഷമമാക്കുന്നതിനും സുതാര്യമാക്കുന്നതിനും വേണ്ടിയാണ് കടകൾ ഡിജിറ്റലൈസ് ചെയ്യുന്നതെന്ന് ഭക്ഷ്യമന്ത്രി പി. തിലോത്തമൻ പറഞ്ഞു. എഫ്.സി.ഐയിൽ നിന്ന് റേഷനുമായി പോകുന്ന വാഹനങ്ങളുടെ നമ്പറുകൾ രേഖപ്പെടുത്തി ജിപിഎസ് വഴി അവ കർശന നിരീക്ഷണത്തിൽ കൊണ്ട് വരും.ഓരോ ലോറിയിലും കയറ്റുന്ന അരിയുടെയും ധാന്യങ്ങളുടെയും കണക്കും സൂക്ഷിക്കും.

റേഷൻ കാർഡുകൾ ആധാർ കാർഡുകളുമായി ബന്ധിപ്പിക്കുന്ന പ്രക്രിയ ഉടൻ പൂർത്തിയാക്കും. നിലവിൽ 95 ശതമാനം കാർഡുകളും കുടുംബനാഥയുടെ ആധാർ കാർഡുമായി ബന്ധിപ്പിച്ചിട്ടുണ്ട്. വ്യാജന്മാരെ കണ്ടെത്തി, യഥാർഥ ഉപഭോക്താക്കൾക്ക് റേഷൻ ലഭിക്കുന്നുണ്ടെന്ന് ഉറപ്പാക്കുകയാണ് ലക്ഷ്യം.

Ration stores in Kerala goes digital

You will receive sms in your phone once rice sack arrive your ration store.