പ്രതീക്ഷിച്ചതിനേക്കാള് അധികമഴ
കേരളത്തിലും രാജ്യത്തും പ്രതീക്ഷിച്ചതിനേക്കാള് അധികമഴയാണ് ഇപ്രാവശ്യം ലഭിച്ചത്. കേരളത്തില് 9 ശതമാനം അധികമഴയാണ് ലഭിച്ചത്. അതോടൊപ്പം സെപ്തംബര് മാസം റെക്കോര്ഡ് മഴയാണ് പെയ്തത്. ജൂണ് ഒന്നിന് തുടങ്ങി സെപ്തംബര് 30 ന് അവസാനിക്കുന്ന കാലവര്ഷ സീസണിലും കേരളത്തില് നല്ല തോതില് മഴ ലഭിച്ചിരുന്നു. 122 ദിവസം നീണ്ടു നിന്ന കാലവര്ഷം അവസാനിക്കുമ്പോള് കേരളത്തില് ലഭിച്ചത് 2227.9 മില്ലിമീറ്റര് മഴയാണ്. കാലയളവില് ശരാശരി ലഭിക്കേണ്ടത് 2049.2 മില്ലിമീറ്റര് മഴയാണ്.
ഏറ്റവും അധികം മഴ കാസര്കോട് ജില്ലയില്
കാസര്കോട് ജില്ലയിലാണ് സംസ്ഥാനത്ത് ഈ കാലവര്ഷത്ത് ഏറ്റവും കൂടുതല് മഴ ലഭിച്ചത്. ജില്ലയില് 360.56 സെമീ മഴയാണ് ലഭിച്ചത്. ഏറ്റവും കുറവ് മഴ ലഭിച്ചത് തിരുവനന്തപുരം ജില്ലയിലാണ് (115.37 സെമീ). വയനാട്, മലപ്പുറം, തൃശൂര്, ഇടുക്കി ജില്ലകളിലൊഴികെ ബാക്കി പത്തിടങ്ങളിലും ശരാശരിയേക്കാള് അധികം മഴ ലഭിച്ചു.
ജൂണില് മഴ 17 ശതമാനം കുറവ്
ജൂണ് മാസം സംസ്ഥാനത്ത് മഴ 17 ശതമാനം കുറവാണ് ലഭിച്ചത്. അതേസമയം, ജൂലായ് മാസത്തില് 23 ശതമാനം അധികമഴ ലഭിച്ചു. കഴിഞ്ഞ രണ്ട് വര്ഷത്തെ പോലെ ഇപ്രാവശ്യവും ഓഗസ്റ്റില് കാലവര്ഷം ശക്തിപ്രാപിച്ചതോടെ സംസ്ഥാനത്ത് ദുരന്തം മഴ പെയ്തു. ഓഗസ്റ്റ് 7- 10 വരെ അതിശക്തമായ മഴയാണ് ലഭിച്ചത്. കഴിഞ്ഞ 20 വര്ഷത്തിനിടെ ഏറ്റവും അധികം മഴ പെയ്ത നാലാമത്തെ ഓഗസ്റ്റ് എന്ന റെക്കോര്ഡോടെയാണ് ഓഗസ്റ്റ് മാസം അവസാനിച്ചത്. ഓഗസ്റ്റ് മാസം ലഭിക്കേണ്ട മഴയുടെ 35 % ത്തിലധികം മഴ ലഭിച്ചു.
ജൂണ് മുതല് സെപ്തംബര് വരെ ലഭിച്ച മഴ
ജൂണ് മാസം കേരളത്തില് 536.1 മില്ലിമീറ്റര് മഴയാണ് ലഭിച്ചത്. ശരാശരി 643 മില്ലിമീറ്റര് മഴയാണ് ലഭിക്കേണ്ടിയിരുന്നത്. 17 % മഴയുടെ കുറവാണ് ജൂണ് മാസം ഉണ്ടായത്. ജൂലായ് മാസം 514 മില്ലിമീറ്റര് മഴയാണ് ലഭിച്ചത്. എന്നാല് ലഭിക്കേണ്ടിയിരുന്നത് 726.1 മില്ലിമീറ്റര് മഴയാണ്. 29 % മഴയുടെ കുറവാണ് ഉണ്ടായത്. ഓഗസ്റ്റ് മാസം ലഭിക്കേണ്ടിയിരുന്നത് 426.7 മില്ലിമീറ്റര് മഴയാണെങ്കിലും 575.7 മില്ലിമീറ്റര് മഴ ലഭിച്ചു. 35 % അധികമഴയാണ് ഓഗസ്റ്റ് മാസം ലഭിച്ചത്. റെക്കോര്ഡ് മഴ പെയ്ത സെപ്തംബറില് ലഭിച്ചത് 601.3 മില്ലിമീറ്റര് മഴയാണ്. എന്നാല് ശരാശരി ലഭിക്കേണ്ടിയിരുന്നത് 259.6 മില്ലിമീറ്റര് മഴയാണ്. 132 % അധികമഴയാണ് സെപ്തംബര് മാസം ലഭിച്ചത്.