കാലവര്‍ഷം ശക്തം: ഡാമുകളിൽ റെക്കോഡ് ജലനിരപ്പ്

കൊച്ചി: സംസ്ഥാനത്ത് കാലവര്‍ഷം ശക്തമായതോടെ ഡാമുകളിൽ റെക്കോഡ് ജലനിരപ്പ്. 142 അടി സംഭരണശേഷിയുള്ള മുല്ലപ്പെരിയാര്‍ ഡാമിൽ ജലനിരപ്പ് 131.2 അടിയായി ഉയര്‍ന്നു. ഇടുക്കി അണക്കെട്ടിലും റെക്കോഡ് ജലനിരപ്പാണ് ഇന്നലെ രേഖപ്പെടുത്തിയത്. 2375.52 അടിയാണ് നിലവിൽ ഡാമിലെ ജലനിരപ്പ്. 1985 ജൂൺ 16ന് ശേഷം രേഖപ്പെടുത്തുന്ന ഏറ്റവും ഉയര്‍ന്ന ജലനിരപ്പാണിത്. 2374.11 അടിയായിരുന്നു അന്ന് രേഖപ്പെടുത്തിയ ജലനിരപ്പ്.

ഡാമിൽ നിലവിൽ 69.38 ശതമാനം വെള്ളമാണുള്ളത്. ഇന്നലെ ഒരു ദിവസം മാത്രം വൃഷ്ടിപ്രദേശത്ത് 73.2 മില്ലിമീറ്ററാണ് മഴ ലഭിച്ചത്.

അതേസമയം, ചൊവ്വാഴ്ച രാവിലെയോടെ മഴയുടെ ശക്തി അൽപം കുറഞ്ഞിട്ടുണ്ട്. വിവിധ ജില്ലകളിലെ കുളങ്ങളും തോടുകളും നിറഞ്ഞുകവിഞ്ഞ നിലയിലാണ്. പാടങ്ങളിൽ നിന്നും തോടുകളിൽ നിന്നും മിക്കയിടത്തും വീടുകളിലേയ്ക്കും കടകളിലേയ്ക്കും വെള്ളം കയറി. വെള്ളിയാഴ്ച വരെ ശക്തമായ മഴ തുടരുമെന്നാണ് കാലാവസ്ഥ മുന്നറിയിപ്പ്.