റെഡ് അലര്‍ട്ട് പിൻവലിച്ചു; രക്ഷാപ്രവര്‍ത്തനം അന്തിമഘട്ടത്തിൽ

കൊച്ചി: കേരളത്തിലെ എല്ലാ ജില്ലകളിൽ നിന്നും റെഡ് അലര്‍ട്ട് പിൻവലിച്ചു. നിലവിൽ 11 ജില്ലകളിൽ ഓറഞ്ച് അലര്‍ട്ട് മാത്രമാണ് പ്രഖ്യാപിച്ചിട്ടുള്ളത്. അതേസമയം, ആലപ്പുഴ ഉള്‍പ്പെടെയുള്ള ജില്ലകളിൽ ഒറ്റപ്പെട്ട സ്ഥലങ്ങളിൽ മഴ പെയ്യുന്നുണ്ട്.

വെള്ളിയാഴ്ച പ്രധാനമന്ത്രി നരേന്ദ്ര മോദി കേരളത്തിലെ പ്രളയബാധിതസ്ഥലങ്ങള്‍ വ്യോമമാര്‍ഗം സന്ദര്‍ശിച്ചിരുന്നു. തിങ്കളാഴ്ച മുതൽ സംസ്ഥാനത്ത് കനത്ത മഴയുണ്ടാകില്ലെന്നാണ് കാലാവസ്ഥാ പ്രവചനം. ചെങ്ങന്നൂരിലും പറവൂര്‍ ഉള്‍പ്പെടെയുള്ള പ്രദേശങ്ങളിലും രക്ഷാപ്രവര്‍ത്തനം അന്തിമഘട്ടത്തിലാണ്.

ഇനിയും വീടുകളിൽ നിന്ന് ക്യാംപുകളിലേയ്ക്ക് മാറ്റാത്ത ആളുകള്‍ക്ക് ബോട്ടുകള്‍ മുഖേനയും ഹെലികോപ്റ്റര്‍ മുഖേനയും ഭക്ഷണമെത്തിക്കുന്നുണ്ട്. എന്നാൽ പാണ്ടനാട് മേഖലയിൽ പമ്പാനദിയ്ക്കപ്പുറമുള്ള ചില മേഖലകളിലേയ്ക്ക് ഇപ്പോഴും എത്തിപ്പെടാനായിട്ടില്ല. ഇവിടേയ്ക്ക് ഹെലികോപ്റ്റര്‍ ഉപയോഗിച്ച് ഭക്ഷണമെത്തിക്കുന്നുണ്ട്.