മുഖ്യമന്ത്രി പങ്കെടുത്ത പരിപാടിക്കിടെ രജിസ്ട്രേഷൻ കൗണ്ടര് തകര്ന്നുവീണു
മുഖ്യമന്ത്രി സംസാരിയ്ക്കുന്നതിനിടെ ഹാളിനു പുറത്തെ രജിസ്ട്രേഷന് കൗണ്ടറാണ് തകർന്ന് വീണത്. അപകടത്തിൽ ഒരാൾക്ക് പരിക്കേറ്റതായാണ് റിപ്പോർട്ടുകൾ.
Samayam Malayalam 14 Nov 2019, 2:37 pm
ഇടുക്കി: കട്ടപ്പനയില് മുഖ്യമന്ത്രി പിണറായി വിജയന് പങ്കെടുത്ത പരിപാടിക്കിടെ രജിസ്ട്രേഷന് കൗണ്ടര് തകര്ന്നുവീണു. മുഖ്യമന്ത്രി പരിപാടിയിൽ സംസാരിച്ചുകൊണ്ടിരിക്കെ ഹാളിനു പുറത്തായിരുന്നു സംഭവം. അപകടത്തിൽ ഒരാൾക്ക് പരിക്കേറ്റു.
സംസ്ഥാന സഹകരണ വാരാഘോഷത്തിന്റെ സംസ്ഥാനല ഉദ്ഘാടന ചടങ്ങിനിടെയാണ് സംഭവം. സെന്റ് ജോര്ജ് ഹാളിലായിരുന്നു മുഖ്യമന്ത്രി പങ്കെടുത്ത പരിപാടി നടന്നത്. പ്രസംഗം നടന്നുകൊണ്ടിരിക്കെ ഹാളിനു പുറത്ത് ടിൻ ഷീറ്റ് കൊണ്ട് നിർമ്മിച്ച രജിസ്ട്രേഷൻ കൗണ്ടര് തകർന്നു വീഴുകയായിരുന്നു.
പരിപാടി ആരംഭിക്കുമ്പോഴേക്കും രജിസ്ട്രേഷൻ നടപടികൾ പൂർത്തിയായതിനാൽ ആളുകളെല്ലാം ഹാളിനകത്തേക്ക് പ്രവേശിച്ചിരുന്നു. ഇതാണ് വലിയ അപകടം ഒഴിവാകാൻ കാരണം. കൗണ്ടര് പൂർണ്ണമായും തകർന്ന് വീണതോടെ ഇതിനടിയിൽപ്പെട്ടാണ് ഒരാൾക്ക് പരിക്കേറ്റത്.
പരിക്കേറ്റയാളെ പോലീസും നാട്ടുകാരും ചേർന്ന് രക്ഷപ്പെടുത്തി ആശുപത്രിയിലേക്ക് കൊണ്ടുപോവുകയായിരുന്നു. മുഖ്യമന്ത്രിയ്ക്ക് പുറമെ മന്ത്രിമാരായ എംഎം മണി, കടകംപള്ളി സുരേന്ദ്രൻ, എംപി ഡീൻ കൂര്യാക്കോസ് തുടങ്ങിയവരും ചടങ്ങിൽ പങ്കെടുത്തിരുന്നു.