സൗമ്യയുടെ മൃതദേഹം ഏറ്റുവാങ്ങില്ലെന്ന് ബന്ധുക്കൾ

കണ്ണൂർ: ഇന്ന് രാവിലെ തൂങ്ങി മരിച്ച നിലയിൽ കണ്ടെത്തിയ സൗമ്യയുടെ മൃതദേഹം ഏറ്റുവാങ്ങില്ലെന്ന് ബന്ധുക്കൾ.പിണറായി കൂട്ടക്കൊലയിൽ ഏക പ്രതിയായിരുന്നു സൗമ്യ.സൗമ്യ മാത്രമല്ല കേസിലെ പ്രതിയെന്നും അത് തെളിയിക്കാൻ പൊലീസിന് കഴിഞ്ഞില്ലെന്നും ബന്ധുക്കൾ ആരോപിച്ചു. കണ്ണൂർ വനിതാ സബ് ജയിൽ പരിസരത്തെ കശുമാവിൽ തൂങ്ങി നിൽക്കുന്ന നിലയിലാണ് മൃതദേഹം കണ്ടെത്തിയത്.

താൻ ചിലരുടെ നിർദേശ പ്രകാരമാണ് കൊലപാതകം ആസൂത്രണം ചെയ്തതെന്ന് സൗമ്യ നേരത്തെ കേരള ലീഗൽ സർവീസ് അതോറിറ്റി പ്രവർത്തകരോട് പറഞ്ഞിരുന്നു. അതിനെ കുറിച്ച് കൂടുതൽ താൻ കോടതിയിൽ വെളിപ്പെടുത്തുമെന്നും സൗമ്യ വ്യക്തമാക്കിയിരുന്നു. സൗമ്യയുടെ വെളിപ്പെടുത്തലിന്മേൽ കൂടുതൽ അന്വേഷണം വേണമെന്ന് സംസ്ഥാന പോലീസ് മേധാവിക്കും ജില്ലാ പോലീസ് മേധാവിക്കും ബന്ധുക്കൾ കത്തയച്ചിരുന്നു.

ആദ്യം കേസ് അന്വേഷിച്ചിരുന്ന ഉദ്യോഗസ്ഥനെതിരെ സൗമ്യയുടെ ബന്ധുക്കൾ പരാതി നൽകിയിരുന്നു. അന്വേഷണത്തെ ഉദ്യോഗസ്ഥൻ അട്ടിമറിച്ചെന്നായിരുന്നു ആരോപണം.സൗമ്യയുടെ മാതാപിതാക്കളെയും മകളെയും കൊലപ്പെടുത്തിയെന്നായിരുന്നു കേസ്. പല സമയത്തായി മൂവരെയും വിഷം നൽകി സൗമ്യ തന്നെ കൊലപ്പെടുത്തിയെന്നാണ് കേസ്. ബന്ധുക്കൾ സ്വീകരിച്ചില്ലെങ്കിൽ സൗമ്യയുടെ സംസ്‌കാരം പയ്യാമ്പലം പൊതുശ്‌മശാനത്തിൽ നടത്തും.