ഇനി 'പത്തിരട്ടി' പരിശോധന; കൊവിഡ് പരിശോധന മാർഗനിർദേശം പുതുക്കി, നിർദേശങ്ങൾ
ആരോഗ്യവകുപ്പ് ഇന്ന് പുറത്തുവിട്ട വാർത്താക്കുറിപ്പിൽ സംസ്ഥാനത്തെ കൊവിഡ് പോസിറ്റിവിറ്റി നിരക്ക് 10.85 ആണ്
പോസിറ്റിവിറ്റി നിരക്കിൽ മാറ്റം
ആരോഗ്യവകുപ്പ് ഇന്ന് പുറത്തുവിട്ട വാർത്താക്കുറിപ്പിൽ സംസ്ഥാനത്തെ കൊവിഡ് പോസിറ്റിവിറ്റി നിരക്ക് 10.85 ആണ്. ലോക്ക് ഡൗൺ ഇളവുകൾ നിലവിൽ വന്ന ദിവസം തന്നെ പോസിറ്റിവിറ്റി നിരക്ക് പത്തിൽ എത്തിയത് പ്രതിരോധ പ്രവർത്തനങ്ങൾക്ക് ഊർജ്ജം പകരും. ഇന്ന് 12,469 പേര്ക്ക് കൊവിഡ് സ്ഥിരീകരിച്ചപ്പോൾ കഴിഞ്ഞ 24 മണിക്കൂറിനിടെ 1,14,894 സാമ്പിളുകളാണ് പരിശോധിച്ചു. ഇന്ന് ചികിത്സയിലായിരുന്ന 13,614 പേര് രോഗമുക്തി നേടി. 1,08,560 പേരാണ് രോഗം സ്ഥിരീകരിച്ച് ഇനി ചികിത്സയിലുള്ളത്. 26,53,207 പേര് ഇതുവരെ കൊവിഡില് നിന്നും മുക്തി നേടി. ടി.പി.ആര്. 30ന് മുകളിലുള്ള 18 തദ്ദേശ സ്വയംഭരണ പ്രദേശങ്ങളാണ് സംസ്ഥാനത്തുള്ളത്. തദ്ദേശസ്വയംഭരണ പ്രദേശങ്ങളിലെ ടി.പി.ആര്. അടിസ്ഥാനമാക്കി പരിശോധനയും വര്ധിപ്പിക്കുന്നതാണ്.
പരിശോധനയ്ക്കായുള്ള മാര്ഗനിര്ദേശങ്ങള് പുതുക്കി
സംസ്ഥാനത്ത് തദ്ദേശസ്വയംഭരണ പ്രദേശങ്ങളിലെ ടി.പി.ആര്. അടിസ്ഥാനമാക്കി കൊവിഡ് പരിശോധന വര്ധിപ്പിക്കുന്നതിന് മാര്ഗനിര്ദേശങ്ങള് പുതുക്കി. ഒരാഴ്ചത്തെ ശരാശരി അനുസരിച്ചാണ് പരിശോധന നടത്തുന്നത്. ഒരാഴ്ചത്തെ ടി.പി.ആര്. 30 ശതമാനത്തിന് മുകളിലായാല് അവസാനത്തെ മൂന്ന് ദിവസത്തെ കേസുകളുടെ എണ്ണത്തിന്റെ പത്തിരട്ടി പരിശോധനയാണ് നടത്തുന്നത്. അതായത് തുടര്ച്ചയായ 3 ദിവസം 100 കേസുകള് വീതമുണ്ടെങ്കില് 300ന്റെ മൂന്ന് മടങ്ങായ 3000 പരിശോധനകളാണ് ദിവസവും നടത്തുക. ടി.പി.ആര്. കുറയുന്നതനുസരിച്ച് പരിശോധനയും മാറുന്നതാണ്.
കൊവിഡ് പരിശോധന ശക്തമാക്കും
ഒരാഴ്ചത്തെ ടി.പി.ആര്. 20നും 30 ശതമാനത്തിനും ഇടയ്ക്കായാല് അവസാനത്തെ മൂന്ന് ദിവസത്തെ കേസുകളുടെ ആറിരട്ടി പരിശോധന നടത്തുന്നതാണ്. ഒരാഴ്ചത്തെ ടി.പി.ആര്. 2നും 20 ശതമാനത്തിനും ഇടയ്ക്കായാല് അവസാനത്തെ മൂന്ന് ദിവസത്തെ കേസുകളുടെ മൂന്നിരട്ടി പരിശോധന നടത്തുന്നതാണ്. ഈ മൂന്ന് വിഭാഗങ്ങള്ക്കും ആന്റിജന്, ആര്.ടി.പി.സി.ആര്., മറ്റ് പരിശോധനകളാണ് നടത്തുന്നത്. ഒരാഴ്ചത്തെ ടി.പി.ആര്. 2 ശതമാനത്തിന് താഴെയായാല് അവസാനത്തെ മൂന്ന് ദിവസത്തെ കേസുകളുടെ അഞ്ചിരട്ടി പരിശോധന നടത്തണം. ഒരു പൂളില് 5 സാമ്പിള് എന്ന നിലയില് ആര്.ടി.പി.സി.ആര്. പൂള്ഡ് പരിശോധനയാണ് നടത്തുക.
തദ്ദേശ സ്ഥാപനങ്ങൾ കേന്ദ്രീകരിച്ച് പരിശോധന
മുനിസിപ്പാലിറ്റി, കോര്പ്പറേഷന്, പഞ്ചായത്ത് / വാര്ഡ് എന്നിവിടങ്ങളിലെ സ്ഥിതി ജില്ലാ സര്വയലന്സ് യൂണിറ്റ് വിശകലനം നടത്തുകയും പരിശോധനയ്ക്കുള്ള ടാര്ജറ്റ് നിശ്ചയിക്കുകയും ചെയ്യും. കൂടുതല് നിരീക്ഷണം ആവശ്യമുള്ള സ്ഥാപനങ്ങള്, വ്യവസായ സ്ഥാപനങ്ങള്, ഫാക്ടറികള്, സ്ഥാപനങ്ങള്, പ്രത്യേക പ്രദേശങ്ങള് തുടങ്ങിയവ നിരീക്ഷിക്കാന് സമീപത്തുള്ള ആരോഗ്യ സ്ഥാപനങ്ങള്ക്ക് നിര്ദ്ദേശങ്ങള് നല്കാം. ആവശ്യമെങ്കില് മൊബൈല് ടെസ്റ്റിംഗ് ലാബുകളും ഉപയോഗിക്കാവുന്നതാണ്.