ബാങ്കുകൾക്ക് മുൻകരുതൽ നിർദേശം നൽകിയതായി സൂചന

തിരുവനന്തപുരം: ഇടുക്കിയിലെയും എറണാകുളത്തെയും പ്രളയബാധിത പ്രദേശങ്ങളിലെ കെട്ടിടങ്ങളുടെ താഴത്തെ നിലകളിൽ പ്രവർത്തിക്കുന്ന ബാങ്ക് ശാഖകളും എടിഎമ്മുകളും പൂട്ടിയേക്കും. ഇടുക്കി ചെറുതോണി ഡാമിന്റെ അഞ്ചാമത്തെ ഷട്ടറും തുറന്ന് കൂടുതൽ ജലം വന്നു തുടങ്ങിയതോടെ നിർദേശം നൽകിയെന്നാണ് റിപ്പോർട്ടുകൾ സൂചിപ്പിക്കുന്നത്. ചില ബാങ്ക് ശാഖകൾക്ക് സർക്കുലർ നൽകിയെന്നാണ് സൂചന.എന്നാൽ, ഔദ്യോഗികമായി സർക്കാർ ഇത് വരെ അറിയിപ്പ് നൽകിയിട്ടില്ലെന്ന് ചില ബാങ്ക് അധികൃതർ പ്രതികരിച്ചു.

ബാങ്കുകളും എടിഎമ്മുകളും അടിയന്തര സാഹചര്യത്തിൽ കറൻസി നോട്ടുകൾ എങ്ങനെ സൂക്ഷിക്കണമെന്നും മറ്റും നിർദേശം നൽകിയെന്നാണ് റിപ്പോർട്ട്. ബാങ്ക് ശാഖകൾ അടിയന്തര സാഹചര്യം കണക്കിലെടുത്ത് പണം മാറ്റാൻ തയ്യാറായിരിക്കണം. എടിഎമ്മിൽ സൂക്ഷിച്ചിരിക്കുന്ന പണം കറൻസി ചെസ്റ്റുകളിലേക്ക് മാറ്റണം. വലിയ തുകകൾ സേഫുകളുടെ ഏറ്റവും ഉയർന്ന റാക്കുകളിൽ സൂക്ഷിക്കാം. എടിഎം കൗണ്ടറുകളുടെ പവർ സപ്ലൈ പൂർണമായും ഓഫ് ചെയ്ത് ഷട്ടറുകൾ അടക്കാനുള്ള നടപടി ഉടൻ തുടങ്ങുമെന്നാണ് റിപ്പോർട്ട്. ബാങ്കുകളിലെ ഇലക്ട്രോണിക് ഉപകരണങ്ങൾ സുരക്ഷിത സ്ഥാനത്തേക്ക് മാറ്റണമെന്നും വലിയ തുകകൾ എടിഎമ്മുകളിൽ സൂക്ഷിക്കേണ്ടെന്ന് നിർദേശം നൽകിയെന്നുമാണ് റിപ്പോർട്ട്.