ശോഭാ സുരേന്ദ്രനെ കേന്ദ്ര വനിത കമ്മീഷന്‍ അധ്യക്ഷസ്ഥാനത്തേക്കോ?; പരിഗണിക്കുന്നതായി റിപ്പോര്‍ട്ട്

തിരുവനന്തപുരം: ബിജെപി സംസ്ഥാന വൈസ് പ്രസിഡന്റ് ശോഭാ സുരേന്ദ്രനെ കേന്ദ്ര വനിതാ കമ്മിഷന്‍ അധ്യക്ഷ സ്ഥാനത്തേയ്ക്ക് പരിഗണിക്കുന്നതായി റിപ്പോര്‍ട്ട്. മാതൃഭൂമി ന്യൂസാണ് ഇക്കാര്യം റിപ്പോര്‍ട്ട് ചെയ്തത്. എന്നാല്‍, ഇതേക്കുറിച്ച് ശോഭാ സുരേന്ദ്രന്‍ പ്രതികരിച്ചിട്ടില്ല.

Also Read: പ്രതിപക്ഷ എംപിമാർ പുറത്ത്; അവശ്യവസ്തു ഭേദഗതി ബിൽ പാസാക്കാൻ രാജ്യസഭ

ശോഭാസുരേന്ദ്രന്റെ നിയമനവുമായി ബന്ധപ്പെട്ട നിയമവശങ്ങള്‍ കേന്ദ്രം പരിശോധിക്കുകയാണെന്നാണ് വിവരം. അതേസമയം, ബിജെപി സംസ്ഥാന സമിതി പുനഃസംഘടനയ്ക്ക് ശേഷം പൊതുരംഗത്ത് നിന്ന് വിട്ടുനില്‍ക്കുകയാണ് ശോഭാ സുരേന്ദ്രന്‍. അധ്യക്ഷപദവിയിലേക്ക് ശോഭാസുരേന്ദ്രന്റെ പേര് ഉയര്‍ന്ന് കേട്ടിരുന്നെങ്കിലും കെ സുരേന്ദ്രന്‍ അധ്യക്ഷ പദവിയിലെത്തിയതിന് ശേഷം നടത്തിയ പുഃനസംഘടനയിലാണ് ജനറല്‍ സെക്രട്ടറി സ്ഥാനത്ത് നിന്ന് ശോഭാ സുരേന്ദ്രനെ മാറ്റി വൈസ് പ്രഡിഡന്റാക്കിയത്.

ഇക്കാര്യത്തിലുള്ള അതൃപ്തിയാണ് ശോഭയുടെ പാര്‍ട്ടി പരിപാടികളിലെ അസാന്നിധ്യത്തിന് കാരണമെന്നാണ് പുറത്തുവരുന്ന വിവരം. സ്വര്‍ണ്ണക്കടത്ത് കേസില്‍ നടന്ന സമരപരമ്പരകളിലൊന്നും അവര്‍ പങ്കെടുത്തിരുന്നില്ല. ഇത് ചര്‍ച്ചയ്ക്ക് ഇടയാക്കിയിരുന്നു.

Also Read: സെപ്തംബറില്‍ റെക്കോര്‍ഡ് മഴ; കേരളത്തില്‍ ലഭിച്ചത് 10 ശതമാനം അധിക മഴ, 80 % ലധികം നിറഞ്ഞ് ഇടുക്കി അണക്കെട്ട്

സോഷ്യല്‍ മീഡിയകളിലൂടെയാണ് ശോഭാ സുരേന്ദ്രന്‍ വിഷയങ്ങളില്‍ അഭിപ്രായം പറഞ്ഞിരുന്നത്. എന്നാല്‍, ശോഭയെ ആരും മാറ്റി നിര്‍ത്തിയിട്ടില്ലെന്ന് പാര്‍ട്ടി നേതൃത്വം വ്യക്തമാക്കുന്നു. ഈ സാഹചര്യത്തില്‍ മറ്റൊരു പദവി നല്‍കി പ്രശ്‌നം പരിഹരിക്കാനാണ് നേതൃത്വം നോക്കുന്നത്. ഏഴ് മാസത്തിലേറെയായി ശോഭ സുരേന്ദ്രന്‍ പൊതുരംഗത്ത് സജീവമാകാത്തതിന് കാരണം അവരോട് തന്നെ ചോദിക്കണമെന്ന് സംസ്ഥാന ബിജെപി അധ്യക്ഷന്‍ കെ സുരേന്ദ്രന്‍ പറഞ്ഞു.