ദുരിതാശ്വാസനിധി; ജനപ്രതിനിധികള്‍ മാതൃകയാകണമെന്ന് വി.എസ്

തിരുവനന്തപുരം: സംസ്ഥാനത്തെ മുഴുവന്‍ എംപിമാരും എംഎല്‍എമാരും ഒരു ലക്ഷം വീതം മുഖ്യമന്ത്രിയുടെ ദുരിതാശ്വാസ നിധിയിലേക്ക് സംഭാവന നല്‍കാന്‍ തയ്യാറാകണമെന്ന് ഭരണ പരിഷ്കാര കമ്മീഷന്‍ അദ്ധ്യക്ഷന്‍ വിഎസ് അച്യുതാനന്ദന്‍. ഇത്തരത്തില്‍ സംസ്ഥാനത്തെ സര്‍ക്കാര്‍ ഉദ്യോഗസ്ഥര്‍ക്ക് മാതൃകയാകാന്‍ ജനപ്രതിനിധികള്‍ കഴിയേണ്ടതുണ്ടെന്നും വിഎസ് കൂട്ടിച്ചേര്‍ത്തു. ഇതിന്‍റെ ഭാഗമായി താന്‍ ഒരു ലക്ഷം രൂപ ദുരിതാശ്വാസ നിധിയിലേക്ക് നല്‍കുന്നുവെന്നും അദ്ദേഹം അറിയിച്ചു.

സംസ്ഥാനത്തെ മുഴുവന്‍ ജനങ്ങളും ഒരു മാസത്തെ ശമ്പളം ദുരിതാശ്വാസ നിധിയിലേക്ക് നല്‍കണമെന്ന് നേരത്തേ മുഖ്യമന്ത്രി അഭ്യര്‍ത്ഥിച്ചിരുന്നു. നവകേരളം സാധ്യമാണെന്നും നമുക്കിടയില്‍ നിന്ന് തന്നെ നമുക്ക് പണം സ്വരൂപിക്കാന്‍ കഴിയുമെന്നും മുഖ്യമന്ത്രി ആത്മവിശ്വാസം പ്രകടിപ്പിച്ചു. മുഖ്യമന്ത്രിയുടെ ഈ അഭ്യര്‍ത്ഥന ആവേശത്തോടെയാണ് ജനങ്ങള്‍ സ്വീകരിച്ചത്. നിരവധി പേരാണ് മുഖ്യമന്ത്രിയുടെ സാലറി ചലഞ്ച് ഏറ്റെടുത്തത്. ഇതുവരെ 700 കോടിയിലേറെ രൂപ ദുരിതാശ്വാസ നിധിയില്‍ എത്തിയതായാണ് കണക്കുകള്‍ വ്യക്തമാക്കുന്നത്.