വ്രതമെടുത്ത് ശബരിമല ചവിട്ടുക തന്നെ ചെയ്യുമെന്ന് രേഷ്‌മ നിഷാന്ത്

കണ്ണൂർ: വ്രതമെടുത്ത് ശബരിമല കയറുക തന്നെ ചെയ്യുമെന്ന് വ്യക്ത മാക്കി കണ്ണൂർ സ്വദേശിനി രേഷ്‌മ നിഷാന്ത്. കൂടുതൽ വനിതകൾ വടക്കൻ കേരളത്തിൽ നിന്ന് തന്നോടൊപ്പം മല ചവിട്ടാൻ വരുമെന്നും രേഷ്‌മ വ്യക്തമാക്കി. ഇന്ന് പോലീസ് സുരക്ഷ വേണമെന്ന് കാണിച്ച് കത്ത് നൽകുമെന്ന് രേഷ്‌മ അറിയിച്ചു.

വർഷങ്ങളായി വ്രതമെടുത്ത് അയ്യപ്പനോട് പ്രാർത്ഥിക്കുന്നു. എന്നാൽ ഇത് വരെ മല ചവിട്ടാൻ കഴിഞ്ഞിട്ടില്ല. 41 ദിവസവും മുഴുവൻ ആചാര വിധിയനുസരിച്ചുള്ള വ്രതവും എടുത്തിട്ടുണ്ട്. താൻ കമ്യൂണിസ്റ്റ് പാർട്ടി അനുഭാവിയാണെങ്കിലും മത വിശ്വാസിയാണെന്നും രേഷ്‌മ വ്യക്തമാക്കി. വിവിധ ഹിന്ദു സംഘടനകളിൽ നിന്ന് തനിക്ക് നേരെ ഭീഷണി ഉയരുന്നുണ്ട്. എന്നാൽ, ഭീഷണികളെ വക വെക്കുന്നില്ലെന്ന് രേഷ്‌മ മാധ്യമങ്ങളോട് വ്യക്തമാക്കി.

ആർത്തവത്തെ വിയർപ്പും മലമൂത്ര വിസർജ്ജനവും പോലെ തന്നെ ശരീരത്തിന് ആവശ്യമില്ലാത്ത പുറം തള്ളൽ മാത്രമായി കാണുന്നുവെന്നും പൂർണ ശുദ്ധിയോടെ വ്രതം പൂർത്തിയാക്കുമെന്നും രേഷ്‌മ കഴിഞ്ഞ ദിവസം ഫേസ്ബുക് പോസ്റ്റിൽ വ്യക്തമാക്കിയിരുന്നു. എന്നാൽ, രേഷ്‌മയുടെ യാത്ര പ്രശസ്തിക്ക് വേണ്ടിയുള്ളതാണെന്നും അയ്യപ്പനോടുള്ള ഭക്തികൊണ്ട് നടത്തുന്നതല്ലെന്നും ബിജെപി സംസ്ഥാനാധ്യക്ഷൻ അഡ്വ. പി.എസ് ശ്രീധരൻ പിള്ള പ്രതികരിച്ചു.