വരുന്നു കൊച്ചി നഗരത്തിനുള്ളിൽ വാട്ടർ തീംപാർക്ക്

കൊച്ചി: വാട്ടർ തീംപാർക്ക് അനുഭവത്തിനായി കൊച്ചിയ്ക്കു പുറത്തേയ്ക്കു പോകുന്ന നഗരവാസികൾക്ക് സന്തോഷവാർത്ത. കൊച്ചിയിലെ കുട്ടികളുടെ പാർക്കാണ് നവീകരണത്തിൻറെ ഭാഗമായി വാട്ട‍‍‍ര്‍ തീം പാര്‍ക്കായി ഉയര്‍ത്തുന്നത്. പദ്ധതിയ്ക്കായി സംസ്ഥാന ടൂറിസം വകുപ്പ് 4 കോടി രൂപ അനുവദിച്ചു. കൂടാതെ 9 കോടി രൂപ ഹൈബി ഈഡൻ എംഎ‍ൽഎ ഫണ്ടിൽ നിന്നും അനുവദിക്കും.



നവീകരണത്തിന്‍റെ ഭാഗമായി വാട്ടര്‍സ്ലൈഡ് കോംപ്ലക്സിനു പുറമെ കുട്ടികള്‍ക്കായി മിനി അ‍ഡ്വഞ്ചര്‍ പാര്‍ക്കും സ്വിമ്മിങ് പൂളും ഒരുക്കാൻ പദ്ധതിയുണ്ട്. ഇതോടൊപ്പം ശാരീരികവെല്ലുവിളികള്‍ നേരിടുന്ന കുട്ടികള്‍ക്കുള്ള വിനോദോപാധികളും പാര്‍ക്കിലൊരുങ്ങും.

കാടുകയറി നാശോന്മുഖമായ പാ‍ര്‍ക്കിലേയ്ക്ക് കുട്ടികളുടെ വരവ് അടുത്തിടെ സാരമായി കുറഞ്ഞിരുന്നു. വാട്ടര്‍ സ്ലൈഡുകള്‍ക്കും സ്വിമ്മിങ് പൂളിനും ഏര്‍പ്പെടുത്തുന്ന പ്രവേശന ഫീസ് പാര്‍ക്കിന്‍റെ പരിപാലനത്തിനായി ചെലവഴിക്കാനാണ് പദ്ധതി. പുതിയ പ്രവേശനകവാടം, ചുറ്റുമതില്‍, കഫറ്റീരിയ എന്നിവയും നവീകരണത്തിന്‍റെ ഭാഗമാണ്. ഉടൻ തന്നെ ടെന്‍ഡര്‍ ക്ഷണിച്ച് രണ്ടുമാസത്തിനകം നിര്‍മാണം തുടങ്ങും.

The revamped Children's park in Kochi city will have waterslides and mini adventure park for children.