മന്ത്രി തോമസ് ചാണ്ടിക്കെതിരെ റവന്യൂ അന്വേഷണം

ആലപ്പുഴ: ഗതാഗത മന്ത്രി തോമസ് ചാണ്ടി ഭൂമി കയ്യേറിയെന്ന പരാതിയിൽ അന്വേഷണം നടത്താൻ റവന്യൂ വകുപ്പ് നിർദേശം. മാത്തൂർ ദേവസ്വം ബോർഡ് നൽകിയ പരാതിയിന്മേലാണ് റവന്യൂ മന്ത്രി ഇ.ചന്ദ്രശേഖരൻ അന്വേഷണത്തിന് നിർദേശം നൽകിയത്. ലാൻഡ് ബോർഡ് സെക്രട്ടറിക്കാണ് മന്ത്രി നിർദ്ദേശം നൽകിയത്.

തോമസ് ചാണ്ടിയുടെ വീടിന്‍റെ അടുത്തുള്ള മാത്തൂര്‍ ദേവസ്വത്തിന്‍റെ 34 ഏക്കര്‍ കൃഷി സ്ഥലം മന്ത്രി കൈവശപ്പെടുത്തിയെന്നാണ് പരാതി. ദേവസ്വത്തിന്‍റെ ഭൂമി നാല് മാസത്തിനകം ചേര്‍ത്തല ലാന്‍ഡ് ട്രൈബ്യൂണല്‍ യഥാര്‍ത്ഥ ഉടമക്ക് തിരിച്ചേല്‍പിക്കണമെന്ന ഹൈക്കോടതി വിധി മൂന്ന് വര്‍ഷമായിട്ടും നടപ്പായില്ല. ഇതേ സംഭവത്തില്‍ മന്ത്രി തോമസ് ചാണ്ടിക്കും കുടുംബാംഗങ്ങള്‍ക്കും രണ്ട് റവന്യൂ ഉദ്യോഗസ്ഥര്‍ക്കുമെതിരെ കോട്ടയം വിജിലന്‍സ് കോടതി കേസും രജിസ്റ്റര്‍ ചെയ്തിട്ടുണ്ട്.

അതിനിടെ, മന്ത്രിയുടെ ഉടമസ്ഥതയിലുള്ള ലേക് പാലസ് റിസോർട്ട് അനധികൃതമായാണ് നിർമിച്ചതെന്ന ആരോപണമുയരുന്നു. റിസോർട്ടിന് മുന്നിൽ വ്യാപകമായി വയൽ നികത്തി വലിയകുളം സീറോ ജെട്ടി വരെ റോഡ് നിർമിച്ചെന്നാണ് ആരോപണം. വയൽ നികത്തുന്നതിന് സംസ്ഥാന തല നിരീക്ഷണ സമിതിയുടെ അനുവാദം തേടിയിട്ടില്ലെന്നും പരാതിയുണ്ട്.

Revenue minister declared probe against Thomas Chandy

Revenue minister had declared probe against transport minister Thomas Chandy for the accusations against him