ശബരിമല സ്ത്രീപ്രവേശനം: ഇന്ന് റിവ്യൂ ഹർജികൾ നൽകും

ന്യൂഡൽഹി: ശബരിമലയിൽ എല്ലാ പ്രായത്തിലുമുള്ള സ്ത്രീകളെ പ്രവേശിപ്പിക്കാനുള്ള സുപ്രീം കോടതി വിധിയ്ക്കെതിരെ ഇന്ന് വിവിധ സംഘടനകള്‍ റിവ്യൂ ഹര്‍ജി നല്‍കിയേക്കും. ക്ഷേത്രാചാരങ്ങളിൽ കടന്നു കയറരുതെന്നും പ്രതിഷ്ഠയുടെ അവകാശങ്ങള്‍ ലംഘിക്കപ്പെടുന്നുവെന്നും ചൂണ്ടിക്കാട്ടി എൻഎസ്എസ് ഉള്‍പ്പെടെയുള്ള സംഘടനകള്‍ ഹര്‍ജി നല്‍കുക.

വിധി പുറപ്പെടുവിച്ച ശേഷം ഒരു മാസം വരെയാണ് പുനഃപരിശോധനാഹര്‍ജികള്‍ നല്‍കാൻ സാധിക്കുക. ആ കാലയളവിന് ശേഷമേ അപേക്ഷകള്‍ പരിഗണിക്കൂ. പൂജ അവധിയ്ക്കായി വെള്ളിയാഴ്ച അടയ്ക്കുന്ന കോടതി 22ന് ശേഷമായിരിക്കും തുറക്കുക.

ശബരിമലയിൽ ഈ മാസം നട തുറക്കുമ്പോള്‍ സന്നിധാനത്ത് വനിതാ പോലീസിനെ വിന്യസിക്കില്ലെന്ന് തീരുമാനിച്ചിട്ടുണ്ട്. മണ്ഡല- മകരവിളക്ക് തീര്‍ത്ഥാടനകാലത്തെ സ്ത്രീകളുടെ തിരക്ക് വിലയിരുത്തിയ ശേഷമായിരിക്കും മലമുകളിലെ വനിതാ പോലീസുകാരുടെ ഡ്യൂട്ടി സംബന്ധിച്ച് തീരുമാനമെടുക്കുക.

ശബരിമല വിഷയത്തിൽ ദേവസ്വം ബോര്‍ഡിലും ഭിന്നത രൂപപ്പെട്ട സാഹചര്യത്തിൽ ബോര്‍ഡ് പ്രതിനിധികള്‍ ഇന്ന് മുഖ്യമന്ത്രിയെ കണ്ടേക്കുമെന്നും സ്ഥിരീകരിക്കാത്ത റിപ്പോര്‍ട്ടുകളുണ്ട്.