കൊവിഡ് ബാധിച്ച കാസര്‍കോട് സ്വദേശിയുടെ റൂട്ട്മാപ്പ് പ്രസിദ്ധീകരിച്ചു; ആരോഗ്യ വകുപ്പിന്‍റെ മാര്‍ഗ നിര്‍ദേശങ്ങള്‍ ലംഘിച്ചിരുന്നെന്ന് റിപ്പോര്‍ട്ട്

കാസര്‍കോട്: കൊവിഡ് 19 ബാധിച്ച കാസര്‍കോട് സ്വദേശിയുടെ റൂട്ട് മാപ്പ് പ്രസിദ്ധീകരിച്ചു. മാര്‍ച്ച് 14 ന് പുലര്‍ച്ചെ 5.20 നാണ് ഇയാള്‍ മംഗളൂരുവിമാനത്താവളത്തില്‍ എത്തിയത്. എയര്‍ ഇന്ത്യ എക്‌സ്പ്രസ് IX 814 വിമാനത്തിലാണ് ഇദ്ദേഹം വന്നത്. ബന്ധുവായ ഒരാളും ഇദ്ദേഹത്തോടൊപ്പം ഉണ്ടായിരുന്നു. മംഗളൂരുവില്‍ ഇവര്‍ ഇരുവരെയും കൂട്ടിക്കൊണ്ടുപോകാന്‍ മറ്റ് രണ്ട് പേര്‍ സ്വകാര്യ കാറില്‍ എത്തിയിരുന്നു.

Also Read: ഓട്ടോയും ബൈക്കും കൂട്ടിയിടിച്ച് രണ്ടു വയസുകാരന് ദാരുണാന്ത്യം

തുടര്‍ന്ന് ഇവര്‍ നാല് പേരും പോയത് സ്വകാര്യ ആശുപത്രിയിലേക്കായിരുന്നു.ഏഴ് മണിയോടെ ആശുപത്രിയില്‍ എത്തി ഗള്‍ഫില്‍ നിന്ന് വന്ന രണ്ട് പേര്‍ മാത്രം സ്രവം പരിശോധനയ്ക്ക് നല്‍കി. കാസര്‍കോട് ജനറല്‍ ആശുപത്രിയിലേക്ക് പോകാന്‍ സ്വകാര്യ ആശുപത്രി അധികൃതര്‍ നിര്‍ദേശം നല്‍കിയിരുന്നു.

Also Read: രോഗികൾക്ക് ആശ്വാസമേകാൻ ഇഷ്ട ഭക്ഷണവും പുസ്തകങ്ങളും; കേരള ആരോഗ്യവകുപ്പിനെ പുകഴ്ത്തി ദേശീയ മാധ്യമങ്ങൾ

എന്നാല്‍ ഇവര്‍ നേരെ പോയത് മറ്റൊരു സ്വകാര്യ ആശുപത്രിയിലെ കാന്‍റീനിലേക്കായിരുന്നു. തുടര്‍ന്ന് പ്രഭാത ഭക്ഷണം കഴിച്ചാണ് ജനറല്‍ ആശുപത്രിയില്‍ എത്തിയത്. അവിടെ നിന്നും നേരെ വീട്ടിലേക്ക് പോകാന്‍ അധികൃതര്‍ നിര്‍ദേശം നല്‍കിയെങ്കിലും ഒരുമണിക്ക് ബേവിഞ്ചയിലെ ഒരുവീട്ടില്‍ സന്ദര്‍ശനം നടത്തുകയായിരുന്നു. തുടര്‍ന്ന് ഒന്നരയോടെ കളനാട്ടെ വസതിയിലെത്തി. അധികൃതരുടെ നിര്‍ദേശത്തെ തുടര്‍ന്ന് സ്വയം നിരീക്ഷണത്തില്‍ കഴിയുകയായിരുന്നു. 16ന് വൈകീട്ടാണ് പോസ്റ്റീവാണെന്ന വിവരം ലഭിക്കുന്നത്. തുടര്‍ന്ന് ജനറലാശുപത്രിയിലെ ഐസൊലേഷന്‍ വാര്‍ഡിലേക്ക് മാറ്റി. അതേസമയം യുവാവിന്‍റെ ആരോഗ്യനില തൃപ്തികരമാണെന്ന് കലക്ടര്‍ ഡി സജിത്ത് ബാബു അറിയിച്ചു.