ശബരിമലയിൽ അക്രമത്തിനു പിന്നിൽ ആര്‍എസ്എസ്: കടകംപള്ളി

ശബരിമല: ശബരിമലയിൽ അക്രമം നടത്തുന്നത് ആര്‍എസ്എസ് ആണെന്ന് ദേവസ്വം മന്ത്രി കടകംപള്ളി സുരേന്ദ്രൻ. അക്രമം നടത്താനായി അയ്യപ്പഭക്തര്‍ എന്ന പേരിൽ കേരളത്തിനു പുറത്തുനിന്ന് ആര്‍എസ്എസ് ക്രിമിനലുകള്‍ എത്തിയെന്ന് കടകംപള്ളി ആരോപിച്ചു. പാവങ്ങളെ തെറ്റിദ്ധരിപ്പിച്ചാണ് ബിജെപി എക്കാലത്തും നേട്ടം കൊയ്യുന്നതെന്നും അവര്‍ ആടിനെ പേപ്പട്ടിയാക്കുന്നത് ഇതാദ്യമല്ലെന്നും കടകംപള്ളി പറഞ്ഞു.

ശബരിമലയിൽ അക്രമം അഴിച്ചുവിട്ട് ഇത് അയ്യപ്പഭക്തരുടെ തലയിൽ കെട്ടാൻ ആര്‍എസ്എസ് ശ്രമിക്കുകയാണ്. അക്രമങ്ങള്‍ അനുവദിക്കില്ലെന്നും ശബരിമലയെ കലാപഭൂമിയാക്കാനുള്ള ശ്രമത്തിൽ നിന്ന് പിൻമാറണമെന്നും കടകംപള്ളി ആര്‍എസ്എസ് ദേശീയനേതൃത്വത്തോട് അഭ്യര്‍ത്ഥിച്ചു.

നിലയ്ക്കലിൽ പ്രതിഷേധത്തിന് നേതൃത്വം നല്‍കുന്ന ബിജെപി നേതാവ് കെ സുരേന്ദ്രനെയും മന്ത്രി രൂക്ഷമായി വിമര്‍ശിച്ചു. ശബരിമല ദര്‍ശനത്തിനുള്ള 41 ദിവസത്തെ വ്രതം 18 ദിവസമായി വെട്ടിച്ചുരുക്കണമെന്ന് ഫേസ്ബുക്കിൽ എഴുതുകയും ശബരിമല യുവതിപ്രവേശനത്തെ അനുകൂലിക്കുകയും ചെയ്ത സുരേന്ദ്രനാണ് നിലയ്ക്കലിൽ കുത്തിയിരുന്ന് പ്രതിഷേധിക്കുന്നതെന്ന് കടകംപള്ളി വിമര്‍ശിച്ചു.

രാജ്യത്തിന്‍റെ വിവിധ ഭാഗങ്ങളിൽ നിന്നും സമാധാനപരമായി അയ്യപ്പദര്‍ശനത്തിനെത്തുന്ന ഭക്തര്‍ക്ക് മുന്നിൽ ഭീതിജനകമായ സാഹചര്യം സൃഷ്ടിക്കുന്ന ആര്‍എസ്എസ് നടപടിയിൽ നിന്ന് പിന്മാറണമെന്ന് കടകംപള്ളി അഭ്യര്‍ത്ഥിച്ചു. രാഷ്ട്രീയം പുറത്തുമതിയെന്നും ശബരിമലയെ കലാപഭൂമിയാക്കരുതെന്നും ബിജെപി സംസ്ഥാന അധ്യക്ഷൻ പി ശ്രീധരൻ പിള്ളയെയും കടകംപള്ളി ഓര്‍മിപ്പിച്ചു.