ശബരിമല വിഷയം: മുന്‍കൂര്‍ ജാമ്യത്തിനുള്ള ശ്രമം ശക്തമാക്കി വത്സന്‍ തില്ലങ്കേരി

കണ്ണൂര്‍: ശബരിമലയില്‍ സ്ത്രീയെ ആക്രമിച്ച കേസില്‍ അറസ്റ്റ് മുന്നില്‍ കണ്ട് മുന്‍കൂര്‍ ജാമ്യത്തിനുള്ള ശ്രമം ശക്തമാക്കി ആര്‍എസ്എസ് നേതാവ് വത്സന്‍ തില്ലങ്കേരി. ജാമ്യാപേക്ഷ തിങ്കളാഴ്ച തലശ്ശേരി കോടതി വാദത്തിനായി മാറ്റിയിരിക്കുകയാണ്.

നവംബര്‍ ആറിന് ശബരിമലയില്‍ ദര്‍ശനത്തിനെത്തിയ 52 കാരിയ ആക്രമിച്ച കേസിലാണ് വത്സന്‍ തില്ലങ്കേരി മുന്‍കൂര്‍ ജാമ്യത്തിനായി ശ്രമിക്കുന്നത്. ബിജെപി ജനറല്‍ സെക്രട്ടറി കെ സുരേന്ദ്രന്‍റെ അറസ്റ്റിനു സമാനമായി വത്സന്‍ തില്ലങ്കേരി പ്രതിയായുള്ള മറ്റുകേസുകളും പോലീസ് പരിശോധിക്കുന്നുണ്ട്.

വത്സന്‍ തിലങ്കേരിക്കെതിരെയുള്ളത് കൃത്രിമമായി കെട്ടിചമച്ച കേസുകളാണ്. ശബരിമലയിലെ സംഘര്‍ഷങ്ങളില്‍ അദ്ദേഹത്തിന് പങ്കില്ല. സന്നിധാനത്തെ സാഹചര്യങ്ങള്‍ നിയന്ത്രിക്കുന്നതിനായി പോലീസിന്‍റെ അറിവോടെയാടെയാണ് മൈക്ക് ഉപയോഗിച്ചതെന്നും മുഖ്യമന്ത്രി നിയമസഭയില്‍ വ്യക്തമാക്കിയിരുന്നു. ഇക്കാര്യങ്ങളാണ് തില്ലങ്കേരി സമര്‍പ്പിച്ച മുന്‍കൂര്‍ ജാമ്യാപേക്ഷയില്‍ പറയുന്നത്.

അതേസമയം സിപിഎം പ്രവര്‍ത്തകനായ യാക്കൂബ് വധക്കേസില്‍ നിലവില്‍ വിചാരണ നേരിടുകയാണ് വത്സന്‍ തില്ലങ്കേരി. ജാമ്യാപേക്ഷയില്‍ അനുകൂല തീരുമാനം ഉണ്ടായില്ലെങ്കില്‍ ഹൈക്കോടതിയെ സമീപിക്കാനാണ് തില്ലങ്കേരിയുടെ നീക്കം.