ശബരിമല തന്ത്രിയുടെ പ്രസ്താവനക്കെതിരെ ജി.സുധാകരൻ

തിരുവനന്തപുരം: ശബരിമലയിൽ യുവതികൾ കയറിയാൽ നട അടച്ചിടുമെന്ന തന്ത്രിയുടെ പ്രസ്‌താവനയെ വിമർശിച്ച് മന്ത്രി ജി.സുധാകരൻ. ഫ്യൂ‍ഡല്‍ പൗരോഹിത്യത്തിന്റെ തകർച്ചയുടെ മണിമുഴക്കമാണ് ശബരിമലയിൽ നിന്ന് കേൾക്കുന്നതെന്ന് മന്ത്രി പറഞ്ഞു.

ശബരിമല തന്ത്രിയെ പിന്തുണച്ച് മാളികപ്പുറം മേൽശാന്തിയും രംഗത്ത് വന്നിരുന്നു. തന്ത്രിയുടെ പ്രസ്താവന കേരളം ചർച്ച ചെയ്യണം. ഹർത്താലിന് കട പൂട്ടുമെന്ന് പറയുന്ന ലാഘവത്തോടെയാണ് തന്ത്രി നട പൂട്ടുമെന്ന് പറയുന്നത്. ശബരിമല ദർശനം നടത്താനാകാതെ യുവതികൾ മടങ്ങിയതിനെയും മന്ത്രി വിമർശിച്ചു. ധൈര്യമുള്ള സ്ത്രീകൾ മാത്രം ശബരിമലയിലേക്ക് പോയാൽ മതി. ചിലർ തിരിച്ചു പോയത് നിരാശാജനകമാണ്. ശബരിമലയിൽ എത്തുന്നവരുടെ പൂർവകാല ചരിത്രം നോക്കേണ്ടതില്ലെന്നും മന്ത്രി വ്യക്തമാക്കി.