ശബരിമല: ഗവർണർ ഡിജിപിയുമായി കൂടിക്കാഴ്‌ച നടത്തി

തിരുവനന്തപുരം: ശബരിമലയിലെ സ്ത്രീ പ്രവേശനവുമായി ബന്ധപ്പെട്ട് സ്ഥിതിഗതികൾ വ്യക്തമാക്കാൻ കേരള ഗവർണർ പി.സദാശിവം ഡിജിപിയുമായി കൂടിക്കാഴ്‌ച നടത്തി. ശബരിമലയിൽ യുവതികളെ പ്രവേശിപ്പിക്കില്ല എന്ന നിലപാട് വിശ്വാസികൾ കടുപ്പിക്കുമ്പോൾ സങ്കീർണമായ സ്ഥിതിഗതികൾ ചർച്ച ചെയ്യാനാണ് ഗവർണർ ഡിജിപിയെ വിളിച്ചു വരുത്തിയത്.

സംഘർഷാവസ്ഥ നിലനിൽക്കുന്ന ശബരിമലയിൽ പോലീസ് സ്വീകരിക്കുന്ന നടപടികൾ എന്തൊക്കെയെന്ന് ഗവർണർ ആരാഞ്ഞു. ഇന്ന് രാവിലെ ശബരിമല കയറാൻ എത്തിയ രണ്ടു യുവതികൾ സന്നിധാനത്തേക്ക് കയറാൻ കഴിയാതെ തിരികെ മടങ്ങി പോയിരുന്നു. ഇന്ന് രാവിലെ രാജ്ഭവനിൽ എത്തിയാണ് ഡിജിപി ലോക്‌നാഥ് ബെഹ്‌റ ഗർവർണറെ കണ്ടത്. സന്നിധാനത്തും പമ്പയിലും ക്രമസമാധാനം ഉറപ്പുവരുത്താൻ പോലീസ് ശ്രദ്ധിക്കണമെന്ന് ഗവർണർ പി.സദാശിവം നിർദേശിച്ചു.