സമരപ്പന്തല്‍ പൊളിച്ചുനീക്കി: നിലയ്ക്കലിലെ സമരക്കാരെ ഒഴിപ്പിച്ചു

നിലയ്ക്കൽ: ശബരിമലയിലെ സ്ത്രീപ്രവേശനത്തെ എതി‍ര്‍ത്ത് നിലയ്ക്കലിൽ സമരം നടത്തിയവരെ പോലീസ് സമരപ്പന്തൽ പൊളിച്ചുനീക്കി ഒഴിപ്പിച്ചു. സ്ഥലത്ത് സംഘര്‍ഷാവസ്ഥയും പ്രതികൂല സാഹചര്യവും ഒഴിവാക്കുന്നതിൻ്റെ ഭാഗമായാണ് പോലീസിൻ്റെ ഈ നടപടി. ആചാര സംരക്ഷണ സമിതിയുടെ നേതൃത്വത്തില്‍ പ്രതിഷേധം നടത്തിവന്ന സമരപ്പന്തലാണ് പോലീസ് പൊളിച്ചുമാറ്റിയത്. തുടര്‍ന്ന് പ്രതിഷേധക്കാര്‍ ചിതറിയോടുകയായിരുന്നു. പുലര്‍ച്ചെ ഹനുമാന്‍ സേന നടത്തിയ പ്രതിഷേധം നേരിയ സംഘര്‍ഷത്തിന് വഴിവെച്ചിരുന്നു.

പ്രതിഷേധക്കാര്‍ ചാനല്‍ മാധ്യമപ്രവര്‍ത്തകര്‍ക്കു നേരേ കൈയ്യേറ്റത്തിനും ശ്രമിച്ചു.. തുടര്‍ന്ന് പോലീസിൻ്റെ നിയന്ത്രണം മറികടന്ന് സമരപ്പന്തലില്‍ കയറിയ നാലുപേരെ പോലീസ് കസ്റ്റഡിയിലെടുത്തിട്ടുണ്ട്. അതിനു ശേഷമാണ് പോലീസ് പന്തല്‍ പൊളിച്ചുനീക്കിയത്. നിലയ്ക്കലിൽ വനിതാ പോലീസടക്കം വലിയ തോതില്‍ പോലീസിനെ വിന്യസിച്ച്‌ സുരക്ഷ ശക്തമാക്കിയിട്ടുണ്ട്. ഒരു കാരണവശാലും ഭക്തരുടെ സഞ്ചാര സ്വാതന്ത്ര്യം തടയാൻ ആരെയും അനുവദിക്കില്ലെന്ന് പോലീസ് വ്യക്തമാക്കിയിട്ടുണ്ട്. നിലയ്ക്കലിൽ നിന്നും ഭക്തരെ പമ്പയിലേക്ക് ബസിൽ കയറ്റിവിടാനാരംഭിച്ചിട്ടുണ്ട്. നിലവിൽ പമ്പയിലെ സ്ഥിതിഗതികൾ ശാന്തമാണ്.

അതിനിടെ തന്ത്രികുടുംബവും സമരത്തിന് രംഗത്തിറങ്ങുകയാണ്. രാവിലെ ഒമ്പത് മണി മുതൽ തന്ത്രി കുടുംബാംഗങ്ങൾ പമ്പയിൽ പ്രാര്‍ത്ഥനാ സമരം ആരംഭിക്കും. നിയമം കൈയ്യിലെടുക്കുന്നവർക്കെതിരെ ശക്തമായ നടപടിയുണ്ടാകുമെന്നും ശബരിമലയിൽ ആർക്കും വന്ന് ദർശനം നടത്തി മടങ്ങാമെന്നും ഡിജിപി വ്യക്തമാക്കി. ശബരിമല പൂർണമായും സുരക്ഷിതമാണെന്നും ഡിജിപി പറഞ്ഞു.

തുലാമാസ പൂജകൾക്കായി ഇന്ന് വൈകിട്ട് അഞ്ച് മണിയോടെ നടതുറക്കും